Champhai district-ah thlai thar lakkhawmna tur hmun 15 ruat

Champhai district-ah thlai thar
lakkhawmna tur hmun 15 ruat
Sawrkarin thlai thar pali a thlan bik tharchhuah lakkhawmna atan Champhai district-ah chuan hmun 15 ruahman a ni.
Sawrkar flagship programme – Bana Kaih Policy hnuaia thlai tharchhuah lakkhawmna leh hralh chhuahna tur ngaihtuahin an chairman, district bawrhsap VL Remliana hoin District Agriculture Marketing Committee Champhai chu Thawhlehni khan an thukhawm.
Chairman chuan kuthnathawktute tana sawrkarin Bana Kaih Policy a duan chu hlawk taka mipuiin an hman theuh a beisei tih sawiin, Champhai district chuan thlai thar chhuah a ngah dawn avangin he policy tihlawhtling tur leh kuthnathawktuten hma an sawn a, man man zawka thlai thar an hralh theihnan line department ho an pawimawh hle a, theihtawp an chhuah a tul tih a sawi a ni.
District Agriculture Marketing Committee hian thlai thar lakkhawmna (Collection Centre) hmun 15 – Tualcheng, Hnahlan DCSO kudam, DCSO kudam New Champhai, Melbuk, Mualkawi, Sazep, Khuangleng, Khawbung, Leithum, Vanzau, Farkawn,Vaphai, N Khawbung, LAMPS Kudam Ramhrangkawn, New Champhai Cold Storage a ruahman. January thla chhung hian Collection Centre building hi tih chian tur niin, Collecton Centre-a thlai thar chhuah dah luh leh hralh chhuahte awmze nei zawka kalpui a nih theihna turin Collection Centre supervisor neih nise, an ti.