Super Cup Clasico hnehtu Barca

Super Cup Clasico hnehtu Barca
Saudi Arabia rama King Abdullah Sports City (khelmualah) Pathianni zan khan El Clasico suanthlak niin, 5-2-a Real Madrid sawptu Barcelona chuan an record kawl lawi sawhnghetin Spanish Super Cup trophy vawi 15 an hawn tling ta a, he inelna bika Catalan team record tluk tum Real-in an tum an hlenchhuak zo lo.
Tun kha a zawna Clasico Super Cup vawithum ngawt an khelhna ni tawhin, kum 2023 khan 3-1-in Barca an chak a; nikumah 4-1-a Real chungnung ve thungin, kuminah erawh Nou Camp club dinchan hun a herchhuak ve leh ta rih a ni.
Pathianni zan Spanish Super Cup final-ah Barcelna hian si phur hmasa zawkin, tan atanga minute ngana lekah Kylian Mbappe chuan solo goal pui tak hmangin Real Madrid hmahruaina goal a thun a, halfway line atanga tlan pheia Barca goalkeeper Wojciech Szczesny dan zawh loh goal a luhpui kha a pui ngei mai!
An lama goal khat lut hi Catalan team chuan goal nga tehrengin an chhanglet a; a tir berah Lamine Yamal chuan minute 22 an khelh tlin rualin Robert Lewandowski ball chhawpsak chu goal-ah chantirin Barcelona siphurh a sut phawt a; chawlhlawk hmain Hansi Flick-a naute hian goal thum dang an khung belh leh!
Barca goal hnihna hi Gavi hlawhchhuah penalty atanga Poland striker Lewandowski chhuihluh niin, a hnu lawk minute 39-ah Brazilian winger Rapinha chuan he inkhela a goal hmasa zawk leh an goal thumna tauhlutin, first half hun pekbelh minute 10-na a kal mek laiin Alejandro Balde chuan Raphinha siamsak atangin Barcelona goal lina a thawh ve leh!
Second half an tan a, minute thum a liam hmain Raphinha bawkin Barcleona goal ngana a thun leh ta mai a, Arab ram Clasico-ah Madrid an tlawm chiang hle dawn niin a lang ruak!
Leeds winger hlui Raphinha khan tun season-ah goal 19 thun tling tawhin, Lewandowski phei chuan goal 26 a puitlin tawh.
Minute 56-ah box pawna tlanchhuak goalkeeper Szczesny chu Real hmatawng Mbappe lakah a ‘foul’ a, red card hmanga hnawhchhuah niin, chu chuan Bernabeu club tan beiseina thar a siam lo thei lo.
Rin ang ngeiin a tam zawk an nih hnu lawkah Brazil forward Rodrygo chuan free-kick chhuih kual ngawkin Szczesny thlaktu keeper Inaki Pena ven goal-ah Real siphurh a sut then a, mahse, hei bak hi Carlo Ancelotti naute’n a tam zawkna nihna hlawkpuiin goal dang an khungbelh zo ta reng reng lo a, Barcelona-in he tournament chanchinah a vawi 15-na’n trophy an chawi ta a ni.
Tun kha Flick-a hnuaia Catalan team-in Clasico ngei maia an hmelma lian ber laka goal tam tham an thun vawihnihna niin, nikum October thla khan La Liga lamah sili fai ngawtin mualneitu Spanish giants hi an lo sawp tawh bawk a ni.
Title tenau ni mah se German coach Hansi Flick-a tan tun kha Bayern Munich a enkawl lai kum 2020-a Bundesliga title a lak hnua trophy a sualchhuah leh vawikhatna a ni nghal.
King Abdullah Sports City stadium inkhel lian result kha mi rin vak loh niin, a chhan pawh Real Madrid hi tunlaia chetha tluang mar zawk niin, inelna hrang hranga an game khelh hnuhnung vawingaah an chak fai vek a, an tlawm hnuhnunber chu nikum December ni 4 daih tawh kha a ni.
Chutih laiin Barca thung kha La Liga game an khelh hnuhnung vawisarihah vawikhat chiah chakin, league table-ah point nga ngawtin Real an pha lo tawh a, point khat leka chungnungin a lerah Atletico Madrid an thu thung.