Infiammite banah kai tan dawn
Infiammite banah kai tan dawn
Olympic 2036 thlir chungin Mizoram sawrkar chuan infiammite bana kaihna tur a duang a, Thawhlehni khan chief minister Lalduhoma’n he programme duan hi a hawng.
Chief minister chuan nikum June-ah Mizorama Sports Conclave an neihah India rama infiamna lama hriatna thuk tak tak neite nen Mizoram sawrkarin sports hmasawnna atana hma a lak dan turah inrawnkhawm a ni, tiin, hemi tum hian sawrkarin Vision 2036 a kalpui tur thu a puang tih a sawi.
India-in 2036 Olympic thlen a tum a, dilna pawh a thehlut tawh a, Prime minister leh ram hruaitu liante an phur hle tih a sawi a. Hei hi thlirin Mizo thalaite India aiawha Olympic 2036-a an inlan theihnan tun atangin hma an la tih a sawi. “Kan tih tur hmasa chu, naupang talent nei thate zawn chhuah a nih angin, he hmalakna tur – Empowering Mizoram Sports hi kalpui a ni,” Lalduhoma hian a ti.
Thalai thlanchhuahte hnena training tha pek bakah sports infrastructure tha neih belh kan tum dawn a. Olympic sports discipline, Mizote khelh theih chi, infrastructure kan la neih si loh lamah kan mit kan len ang. Sports minister tha tak kan nei a, a thlamuanthlak a, kum reiloteah hmasawnna hmel duhawm tak tak kan hmuh ngei ka ring, a ti.
Sports & Youth Services minister Lalnghinglova Hmar pawhin EMS hmalakna hian thingtlang kilkhawr ber ber a thleng phak dawn a. Chutihrualin sawmna an dawnna hmun chauh an pan thin dawn tih a sawi. A bikin Olympic sports discipline, Mizoten theihna kan neihna ni si lamah zel insawrbing an tum tih sawiin, “Sawrkarin amahin engmah a kalpui thei loa, khawtina khawtlang hruaitute leh Mizoram State Sports Council nen tangtlangin kan kal dawn,” a ti. Thawhpui atan corporate lian tak tak nena an inbe mek tih a sawi bawk.
MSSC secretary Henry C Lalrawnkima’n Empowering Mizoram Sports hmachhawp leh hmalak tawh chin a sawifiah a. He programme bultanna atan hian sawrkar chuan cheng vaibelchhe 2.5 a dah a, tunah hian naupang theihna nei dap chhuahna hmahruai atan Tuichangral leh Tuipuiral Games huaihawt tan mek a ni.