ITI-ah Toyata-in thiamthil zirtir

ITI-ah Toyata-in thiamthil zirtir
Government Industrial Training Institute (ITI) Aizawla Toyota Technical Education Program (T-TEP) neih chu Labour, Employment, Skill Development & Entrepreneurship (LESDE) minister Lalnghinglova Hmar chuan Thawhlehni khan a hawng. He training programme hnuaiah hian Toyota Kirloskar Motor Private Limited (TKM) chuan Govt. ITI a zirlaite tan general technician (mechanic) course zirtirna a pe dawn.
LESDE minister chuan Mizoram sawrkarin thalaiten chhawr tlak thiamna an neih theihnan kang hrang hranga hma la in, a bikin skill development leh entrepreneurship atana theihtawp a chhuah tih a sawi a. TKM nena thawhhona zarah hemi kawnga tangkai tur ‘Toyota-Technical Education Program’ hmalakna chuan zirlaite tan industry lian tak taka thawh theihna kawng a hawn theih a beisei tih sawiin, chutiang tur chuan zirlaite pawh tih tak takna nen theihtawp chhuaha zir turin a chah.
T-TEP hi kum 2006 khan bul tan niin, India ram state hrang hrangah ITI/ polytechnic /diploma institution dangte a thawhpui a; zirlai thahnem tak an lo inzir chhuak tawh. Mizoram hi he programme kalpuina state 27-na a ni a. Training-na hmunhma, institute-in a lo neih sa chu an company standard mil turin a tul anga thuamtha in, course atan material/ equipment ngai zawng zawng chu Toyota Kirloskar Motors-in an tum a. Zirtirtu tur company-in a train chhuah hmasak bakah guest instructor an kal thin bawk.
Govt. ITI-a thawktu Vanlalthafamkima leh Lalhriatrenga te chu he course zirtirna pe tur hian training an lo paltlang tawh a. Course hi kum khat chhunga rei niin, course tawpa exam an pass chuan Toyota certificate pek an ni ang. Tun tumah hian mi 24 an training.
Toyota Kirloskar Motor Pvt Ltd executive vice chairman leh Country head Vikram Gulati, vice president Arun G Nair leh general manager PA Balusubramanaim ten training hawnna hi a rawn chhim a ni.