CISF battalion hnih siam thar belh dawn

Ministry of Home Affairs (MHA) chuan Central Industrial Security Force (CISF) tihlenna tur pawmin battalion thar pahnih siam a ni dawn.
Battalion thar turah hian sipai 1,025 ve ve an awm dawn a, CISF battalion chu 13 atangin 15 a kai dawn a, hna thar 2,050 a siam belh dawn a ni.
Battalion din thar tur pahnih hi senior commandant rank officer-in an kaihruai ang a. CISF mamawh zualnaah dah tur an ni a, hengte hi ram chhung himna atan leh lung in venhim ngai zual te pawh a tel.
CISF battalion din thar tur hi tun hnai lawka Mahila Battalion din thar tura tih hnua thutlukna siam a ni a, he battalion pawh hian ram himna a tihhmasawn dawn bakah hna thar 2,000 chuang a siam dawn a ni.
CISF tihlen tur nen hian sipai nuai hnih dawn an awm dawn ta a ni.
Reserve battalion-ah hian a bik taka zirtirna pek sipai an awm thin a, lung in venhim ngai zual bika awm thei tura zirtirna bik pek an ni a. Thil dang pawimawhah pawh hman thin an ni.
Battalion din thar tur hian CISF-in rikrum thila chet chhuah an ngaihah nasa takin a pui thei dawn a. Veivah zung zungna tur leh ralthuam nena thuam an ni a, hun pawimawh leh khirh bik, vantlang himna tura chet chhuah ngaiah rang taka chettir zung zung theih an ni.
“Mi thar an awm tur hian tuna tang lai mekte hah a chhawk thei dawn a. Chawlh han lak zeuh an ngai pawhin a buaithlak nep deuh thei dawn a ni,” tiin CISF Inspector General Ajay Dahiya chuan a sawi.
CISF hi India-a Central Armed Police Forces zinga mi niin CISF Act, of 1968 hnuaia din a ni a. Public sector undertaking (PSU)-te veng tura tih an ni a, an huam chin tihzauh zel niin ram chhunga hmun leh thil pawimawh bik veng tura tih an ni ta zel bawk.
Industry pawimawh te, sorkar building te, nuclear leh space hmun te, thlawhna tumhmun, lawngchawlhna leh hman lai hmun hlui te pawh an veng a. A tul angin agency dang nen vantlang himna atana pawimawhah an che chhuak thin bawk.