Ft 108-a sangah hnam puanzar zar

Defence Minister Rajnath Singh-a chuan Thawhlehni khan India hnam puanzar feet 108-a sangah a zar a, Jammu-a Akhnoor ramri hrulah heritage museum a hawng bawk tih defence thupuangtuin a sawi.
Singh-a hi chief of defence staff (CDS)-in tawiawmin Lieutenant Governor Manoj Sinha, Chief Minister Omar Abdullah leh sorkar mi pawimawh dangten venhimna khauh tak hnuaiah an dawngsawng a ni.
Defence minister hi Tanda Artillery Brigade-a 9th Armed Forces Veterans’ Day hmannaah a tel bawk. Jammu & Kashmir Chief Minister Abdullah chu union territory leh Delhi mipuite thinlung a suih zawm thiam avanga lawm thu hrilhin BJP sorkar chuan Delhi leh Kashmir chu angkhata a en thu a sawi bawk.
“Kashmir hi sorkar hmasate khan an en danglam bik a, kan unaute pawh Delhi nen hian an inpawh lo phah thin a. Sorkar liam tawhte tih dan kha kan duh lo va, kan sorkarin hlawhtlinna a chan len ber pakhat chu Kashmir leh ram chhung hmun danga mite thinlunga insuih zawmna siam hi a ni,” a ti.
“Chief Minister Omar Abdullah hi hemi rahbi atana kawng a hawnnaah lawm thu ka hrilh a, ka fak bawk a ni,” tiin defence minister chuan a sawi.
Museum a hawnah hian Jammu & Kashmir-a indona chhuak tawha ralthuam hman hrang hrangte pho chhuah a ni a. Indonaa thite sulhnu leh thil hlui dah a ni bawk.
9th Armed Forces Veterans’ Day hmannaah hian Jammu, Akhnoor, Pallanwala, Rakhmuthi, Naushera, leh Sunderbani atangin sipai bâng 1,000 chuang an tel niin defence thupuangtu chuan a sawi.
Sipai bângte hnenah chibai buk nan motorised wheelchair, e-scooter leh auto-rickshaw te sem a ni bawk.