Ukraine indonaah North Korean sipai 300 thi tawh – South Korean MP
South Korean MP pakhat chuan an spy agency-te chhinchhiah danin Russia-in Ukraine a rûn meknaah North Korean sipai 300 vel an thi tawh a, 2,700 an inhliam tawh niin a sawi.
Seoul hian a hma khan North Korean leader Kim Jong Un-a’n Moscow-in Kyiv a beih meknaah sipai 10,000 a thawn tih a lo sawi tawh a. Hei hi ram dangten Pyongyang an hrek nasat kara Russia-in ralthuam leh satellite programme-a a puihna rulh let nana a tih niin an sawi.
Kartawpah khan Ukrainian President Volodymyr Zelensky chuan Kyiv-in North Korean sipai pahnih an man thu leh an biak lai video a tichhuak a, Ukrainian sipai tang mekte nena inthlengpui atan a duh thu a sawi bawk.
“North Korean sipaite Russia-a an awmna chin hi zau zelin Kursk region a thleng tawh a, thi leh hliam zat pawh 3,000 an tling tawh a ni,” tiin MP Lee Seong-kweun-a hian spy agency-in an hrilh hnuah thuthar lakhawmtute hnenah a sawi.
Heng sipai zinga ‘300 vel chu thi leh 2,700 vel inhliam’ niin Lee-a hian a sawi a ni.
Seoul-a National Intelligence Service-in an hrilh dan chuan North Korea-a sipai tha bik, Storm Corps-a telte chu man aiin mahni intihlum mai tura tih an ni tih a sawi bawk.
“Sipai thite ruanga an thil lo kawlte atangin sipaite hi North Korean thuneitute chuan man an nih hmaa intihlum tur emaw, an bomb pai hmanga intipuak tura tih an ni tih a lang,” a ti.
Sipai thenkhat chu an chungah ‘zahngaihna lantir an ni a, North Korea-a rorel lai, Workers’ Party zawm zui phalsak an ni bawk tih a sawi bawk.
North Korean sipai man pakhat chu ‘General Kim Jong Un’ tiin a au va, a grenade pai tihpuah a tum zui a, kah niin that zui a ni ta niin Lee chuan a sawi.
NIS-in an zir chiannaah chuan North Korean sipaite hian ‘tun lai thiamna nena indona chu an hre thiam tlem hle’ tih an hmu a, Russia hian an dahna hmun pawh ‘thi an tamna lai zel’ a nih thu Lee hian a sawi.
Hetih lai hian Kyiv-a Special Operations Forces chuan Thawhtanni khan Telegram-ah sipaiten Kursk an beihnaah North Korean sipai 18 an that leh niin an tar lang.
An zinga 17 hi Ukrainian sipaite thah a ni a, pakhat chu ‘a grenade pai tipuakin a intihlum’ niin an sawi.