ZPM-a beidawng luhkhawmna turin MNF kan inbuatsaih mek – MNF vice president

On Jan 21, 2025 9 0

ZPM-a beidawng luhkhawmna
turin MNF kan inbuatsaih mek
– MNF vice president
ZPM sawrkara beidawngte luhkhawmna turin an party a inbuatsaih mek tih MNF vice president Vanlalzawma chuan a sawi.
Thawhtannia Mizo Hnam Runa inkhawmah Vanlalzawma chuan kan dinhmun mek enin, he ram hi a him em, he hnam hi a dam em tih ngaihtuah a ngai tih a sawi a. A tul chuan ram leh hnam tana thi turin MNF tobulah kir leh turin a sawm tih a sawi.
LC/ VC inthlan turah MNF Block leh Unit hruaitute an phur a, an phur chhan chu ZPM sawrkar a pian theihna tura vote-tu tam takten ZPM sawrkar an thlawpna an hnukkir mek vang niin a sawi. ZPM sawrkar chu inthlan hmaa an sawi angin an awm loa, an sawi loh angin an awm zawk, tiin, an sawrkar hma leh an sawrkar hnu an thusawi a insual nasa hle tih a sawi.
Sawrkar mekah thalai beidawng an tam nia sawiin, “Thalai beidawngte luhkhawmna buatsaih a tul a, hmeichhe tana hamthatna siam chungchang MNF party chuan ngaihpawihmawh a tul. Sawrkar kan hrawn meka beidawngte luhkhawmna turin MNF party a inbuatsaih mek a. Covid vanga harsatna, Assam nen kan ramri avanga ram humhalh kawngah, kan unau raltlante tuamhlawm a, budget pawh awm loa MNF sawrkarin thiam taka kohhran leh tlawmngai pawl a thawhpui danah Zoram mipuiin min lawm a ni,” MNF vice president hian a ti.
MNF party chu thlahtute atanga Pathian pek Mizoram leh a leilung fate humhalha venhim, Mizo hnahthlakte luah chin ram rorelna pakhat hnuaia dah, Mizote sakhua humhim leh chawisan leh a dangah pawl thil tuma neitu party a ni tih a sawi bawk.