Sawrkar lai thawhpui thei tur LC/ VC kan mamawh

Sawrkar laiin a thawhpui theih tur local council leh village council an mamawh tih chief minister Lalduhoma chuan a sawi.
Nilainia ZPM Thenzawl Block huamchhunga VC candidate tur puan a hmanpuinaah Serchhip bialtu MLA Lalduhoma chuan kalphung thar mipui sawrkarin ram rorelnaa Pathian ram a thlen theihnan leh sawrkar hmalaknain mipui tana hmasawnna tluantling a thlen theihnan sawrkar lai thawhpui thei tur LC/ VC an mamawh tihu sawiin, “LC/VC te hi sawrkar kut leh ke pawimawh tak an ni a, LC/VC tha nei veng leh khua chuan hmasawnna tam tak an khawtlang tan an chawlut thin. Chutih laiin opposition LC/VC zingah sawrkar thawhpui hleithei lo an awm hian sawrkar hmalaknain mipui a thleng zo lo fo thin a. ZPM party chuan Pathian leh mipui duhsakna changin sawrkarna kum khat kan chelh ta a, hmasawnna hna thawh tak tak dawn chuan sawrkar lai thawhpui thei LC/VC an pawimawh zia a takin kan tawng chho mek,” a ti.
Local council leh VC inthlanah ruling party tan candidate thlan a har thin tih sawiin, mitha tam tak leh candidate awm tak tak an lo awm tawh avang leh rorel lai party thawhpui thei tur mitha engemawzat an lo awm ve tawh vang a ni tih sawiin, chutiang dinhmun chu ZPM party pawhin an tawng mek a, an hotuten candidate atana an ruat apiang thahnemngai taka thawhpui turin Zoram dung leh vanga lungrualpuite an ngen tih a sawi.
Thenzawl Block huamchhungah hian VC area 7 awmin ZPM hian VC area tinah candidate tur an ruat kim vek a ni.