Ruihhlo hlauhawm meth man hnem

Kum liam taah khan Mizoram Excise & Narcotics (MEN) department-in meth kg 140 chuang an man a, Mizoram hi meth laka la himah ngaih a nih avangin kg 140 vel man a ni hi a tam tia sawi theih a ni ang.
Meth tia sawi ‘methamphetamine hi man tur a awm deuh reng a, mahse Mizoram pawna mi tur a lo ni deuh zel. Mizoram chu a la himah MEN department chuan an ngai.
MEN department chhinchhiahnaa a lan danin, 2024-ah khan meth hi kg 140.839 an man a, 2019 tih lohvah chuan an man tam ber kum a ni. 2019-ah khan kg 146.129 an man.
2024-ah hian January atanga April thlengin thla tin an man a, thla ruk an man loh hnuah November-ah an man leh. November-ah hian kg 10 chuang an man a, hei hi mi pakhat kut atanga a hlawma an man niin, Mizoram pawna mi tur a lo ni.
Meth hi 2001-ah an man tan a, 2002-ah an man leh a, an awl vang vang hnuah 2011-ah an man leh.
Police pawhin an man hnem a, kum liam taah khan kg 604.4 an man. Meth chi dang crystal meth an tih pawh an man nual.
Mizorama meth man tur a awm reng hi, MEN department leh police te chuan a tawlh kawng a nih vang a ni tiin an sawi a, Mizoram a la himah an ngai a, mahse hmun danga mi tur lakna kawng a nih avangin man tur hi a awm deuh reng tih an sawi.