CM-te khuaah ZPM VC

Chief minister Lalduhoma khawchhuahna Tualpuiah chuan amah chawimawina pakhat atan political party dangin village council candidate nei loin ZPM party candidate-te thlawp an tum.
Tualpui Welfare Aizawl thuchhuak chuan, village council inthlanpui neih turah an khawtlang, Tualpui mipui leh political party hrang hrang hruaitute chu chief minister khua an nih anga a hranpaa political party inhruipawhna awm loa, ZPM party candidate-te lungrual taka lo thlawp turin an ngen a.
An ngenna hi Tualpuia political party hrang hrang hruaitute chuan pawmin, Pu Lalduhoma an chawimawina leh khawtlang inlungrual tak an nih lantirna atan ZPM candidate chu lungrual taka thlawp an remti ta tih a sawi.
‘He an thil tih ropui tak avang hian Tualpui Welfare Aizawl chu kan lawm a. Chief minister Pu Lalduhoma chawimawi duhna thinlung thianghlim tak leh khawtlang inlungrual kan nih zia lantirna hi zahawm tak a ni,’ a ti.