BJP thlawpna a hnuhdawh hnuah JD(U)-in Manipur unit chief an bân

BJP thlawpna a hnuhdawh hnuah JD(U)-in Manipur unit chief an bân
Nitish Kumar-a kaihhruai, Janata Dal (United) chuan Manipur-a an party chief Ksh Biren Singh chu Nilaini khan an bân a. Hemi hma lawk hian Singh hian Governor Ajay Kumar Bhalla hnenah MLA an neih chhunin BJP kaihhruai sorkar a thlawpna a hnuhdawh thu leh assembly-ah pawh eptua chhiar tura ngenna a thlen.
“He thil hi hriat sual leh tanchhan engmah nei lo a ni,” JD(U) thupuangtu, Rajeev Ranjan Prasad chuan news agency ANI hnenah an party state unit chief bân a nih thu social media-a a darh hnua a hrilh.
“Party chuan kan ngaihtuah nghal a, Manipur unit president chu a nihna atangin chawlhtir a ni a. NDA hi kan thlawp a, Manipur-a NDA sorkar pawh kan thlawp zel ang. Manipur unit hian hemi chungchangah hian central hotute an rawn lo va, pawmpuina pawh an nei lo. Lehkha kha state president-in ama thua a ziah a ni a. A chet dan hi a inthunun loh thlak a, a lakah action lak a ni ta a ni,” tiin Prasad hian a sawi.
Manipur-ah hian assembly-a member 60 awm theihnaah Chief Minister Biren Singh-a BJP hian member 32 neiin sorkar siam thei sa an ni.
Governor hnena lehkha a thawnah Singh-a chuan JD (U) chuan an state-a BJP kaihhruai sorkar thlawpna a hnuhdawh hnuah chuan eptu, INDIA tangho zingah a tel tak thu a ziak a. An MLA neih chhun, Md Abdul Nasir-a thutna pawh speaker-in a sawnsak tawh niin a ziak bawk.
“Assembly session hnuhnung berah pawh khan speaker-in Manipur-a JD(U) MLA Md Abdul Nasir-a thutna chu eptu thutnaah a dah tawh a ni,” tiin a ziak.
Kum 2022 inthlanah khan JD(U) hian MLA paruk an nei a; mahse, panga chuan BJP an zawm zui a. An tlinna party kalsana an chet dan chu dan anga hmalak theih a ni em tih chu speaker kutah a la awm mek.
Manipur-ah hian BJP-in MLA 32 an nei a, JD (U)-in paruk an nei bawk a. National People’s Party (NPP)-in pasarih, Naga People’s Front (NPF)-in panga, Kuki People’s Alliance (KPA)-in pahnih leh Congress-in panga an nei a. Independent MLA pathum an awm bawk.
NPP hian Manipur sorkar an thlawpna chu November khan an lo hnukdawk tawh a, NDA hian MLA 44 an la nei tho.