Mipui kuta sum a luh theihnan NLUP changtlung zawk kan duang – Lalnunmawia Chuaungo

Mipui kuta sum a luh theihnan
NLUP changtlung zawk kan duang
– Lalnunmawia Chuaungo
Mipui nawlpuiin sum an neih theihna turin an kuta sum a luh a ngai a, chumi atan chuan NLUP changtlung zawk an duang a, a thlawna sem lam niloin, mipuiin leirem an rah theihna tur a ni tih Congress hruaitu Lalnunmawia Chuaungo chuan a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, mi hausate an hausak belh thur thur ringawt chu ram hmasawnna a ni loa, mipui nawlpuiin hma an sawn chuan ramin hma a sawn a. Mipui nawlpuiin sum an neih loh a, thil leina tur an neih hleihtheih loh chuan sumdawngte pawhin an tuar thin tih a sawi. “Mipui nawlpui kuta sum a luh theihnan NLUP changtlung zawk, chhungkaw tinin an hlawhtlinpui theih turin Congress party chuan hma lak kan tum a. A thlawna sem lam a ni loa, mipuiin lei rem an rah leh theihna tur, ramin hma a sawnna tur a ni,” a ti.
Buh kan tuh loh chuan a rah seng tur a awm ngai lo, tiin, local council leh village council inthlan tur pawh buh tuhna hmasa, nakina a rah kan seng leh tur a ni tih a sawi.
ZPM chu an inzawrh thiam avangin an lakah mipuiin beiseina an nei a. A beisei lemlote pawhin enchhin ve hrim hrim an duh a, hneh takin mipuiin an thlangtling tih MPCC hruaitu hian sawiin, “Kum khat chuang an sawrkar ta a, hetihlai hian mi tam takin Congress party hi ngawireng angah leh sawrkar kal dik lohna sawi tam loah min ngai a, hengte hi kan hre lo a ni lo. Kum khat em an la sawrkar loa, an intiamkamna an tih leh loh, ti lo tura an intiam an tih leh si te, ram tana thil pawi leh nakina siamthat harsa tur thil pawi an khawih a nih chuan kan bei zel dawn. Ram tihchhiata a awm lohna atan leh mipui thlavang hauhna atan tun atang phei chuan kan sawichhuak ve tan tawh dawn,” a ti.
Congress party chu miten a tak taka thawk thei tur an ni tih an hre chho mek nia sawiin, tunah pawh ram hmangaihtu mithar tha tak takin an rawn zawm belh mek tih a sawi a ni.