Aizawla RBD-te hriat tur zirtir

Aizawl Municipal Corporation buatsaihin an huamchhunga Registrar of Births & Deaths (RBD) te chu Civil Registration System chungchang inzirtir pahin an inkokhawm.
Aizawl Municipal commissioner Joseph H Lalramsanga chuan kalkhawmte lawmna thu sawiin, RBD-te chu rinawm tak leh uluk taka an hna thawk turin a fuih a. Aizawl khawpui changkanna leh than zelna tura AMC hmalakna kawng hrang hrangah thawhho puiah a sawm a ni.
Directorate of Economics & Statistics atangin deputy director B. Vanlalrengi leh inspector J. Ramdinmawia ten registrar-te hriat tur pawimawh leh an inzir ngaihna an hrilh.
AMC huamchhungah hian damdawi in behchhan RBD 24 leh veng (local) behchhan RBD 85 an awm a. 2024 November 11 atang khan damdawi in behchhana RBD 24 hian online registration kalpuiin, piang leh thi hnenah digitized certificate pek chhuah a ni tawh. Hetiang hian veng (local) tana RBD 85-te hi kumin February 1 atangin online registration ti a, digitised certificate pe chhuak thei turin training hi neihpui an ni.