J&K khaw pakhata mak taka mi 17 thihna chhui
J&K khaw pakhata mak taka mi 17 thihna chhui
India-in a awp chin Jammu & Kashmir khaw pakhata tun hnaia mak taka mi 17 zet, a tam zawk naupang an thihna chu an chhui mek.
Thi zinga 12 hi naupang niin Jammu-a Rajouri district chhung khaw kilkhawr tak, Badhal-ah December 7 atang khan an thi a ni.
Thite hi an nat dan a inang deuh vek a, thil ei sual nei ang takin an awm a, a hnu reilo te-ah nikhua an hre lo zui nghal mai niin health thuneitute chuan an sawi.
Khaw pum hi containment zone-ah an puang a; mahse, thuneitute chuan inkaichhawn theih thil nia a lan loh thu an sawi a, hri leng ang chi a nih loh thu an sawi.
Tual chung damdawi in hotu, Dr AS Bhatia chuan a na hmasa panga zinga pali chu naupang an ni tih a sawi a, an nat dan chu thil ei sual ang deuh niin an luak a, an kua a tha lo bawk niin a sawi a. Thenkhatin hrawk na leh thawk lam harsatna an nei bawk.
A hnu reilo te-ah an hriatna an hloh zui ta nghal mai niin a sawi.
Sorkar laipuiin chhui chianna tur thupek a tichhuak a. Tual chhung thuneituten special investigation team din an zingah hian police officer, pathologist leh specialist dangte telin mi thahnem tak thu an zawt fiah tawh.
An chhui chinah chuan ei tur leh tui thianghlim tawk lo ei leh in vanga awm niin an ngai a. Khuaa chengte tui tlan an endiknaah a thianghlim tawk lo hle tih an hmuh hnuah in tawh lo turin an ti nghal bawk.
Thihna hi December 7 atang khan thlengin January 19 thleng khan an thi a, thite hi chhungkaw inhnai tak pathuma mite an ni a. Naupang paruk phei chu inunau an ni a, kum sarih leh 15 inkar an ni a. An in chu luh theih loh tura khar rih a ni.
Doctor-te chuan inkai theih niin an hre lo va, thuneitute chuan chhungkaw pathumte hnimhnaih deuhte zawng chhuakin Rajouri-a damdawi inah an dah a, an dinhmun an thlithlai mek a. Badhal khuaa cheng zawng zawngte chu thuneituten ei tur leh in tur an pek bak engmah eiin in lo turin an ti bawk.
“A tuartu chhungkaw ina ei leh in theih chi awm zawng zawng chu thuneituten an la vek,” an ti.
Rajouri, Jammu leh Chandigarh-a damdawi inah te mi 10 vel enkawl tura dah an la awm bawk.
Rajouri-a Government Medical College-a epidemiologist Dr Shuja Quadri chuan natna hi tual chhung bil thil a ni a, a len darh emaw, hri ang emaw a nih loh thu a sawi.
December 12-a a hlawm deuhva damdawi ina dah luh mi panga, naupang kum khat mi telin, an zavaiin an dam leh vek tawh bawk.
“Hei hian beiseina min siamsak a ni,” tiin Dr Bhatia chuan a sawi.