Mizoramah Voters’ Day hmang
Mizoramah Voters’ Day hmang
January 25 kha India ram puma vote nei tawhte hnena inthlan kaihhnawiha hriat tur pawimawh inhrilh tharna atana hman thin – National Voters’ Day a ni a. Mizoramah pawh district hrang hrangah hman a ni.
Aizawlah chuan larsap Gen Vijay Kumar Singh (Retd) hoin National Voters’ Day tum 15-na hi hman a ni a. Election Commission of India chu India rama democracy tundin leh chhawmnun zel kawnga hmalatu pawimawh, a innghahna lungpui leh tha tichaktu a ni tih sawiin, “A tul angin a inherdanglam ve zel a; inthlan felfai, muanawm leh tute tan pawha khairual tak hmingtha takin a buaipui thin. India ram kilkhawr ber thlenga inthlanna atana electronic voting machine (EVM) hman a ni hi hmalakna huai leh khawvel fakrawn a ni a. India chu khawvela democracy hlawhtling ber tia hriat hlawh ni mekin, India Danpui duhdan angin inthlan felfai leh muanawm tak neih a ni thin. Democracy hlawhtling leh thangduang tak kan ni hi rambuaiin a chim mek thenawm ramte awh rawn a ni,” a ti.
Mizorama hlawhtling tak Lok Sabha Inthlanpui 2024 buaipuitu CEO, DEO leh official zawng zawng chhuanawm a tih rualin, inthlan buaipuitu zinga police 5-in nunna hlu tak an chan erawh pawi a ti takzet tih larsap hian a sawi a. State sawrkarin ralna sum cheng nuai 15 theuh an chhungte hnenah a hlan tih a sawi. Mizoram mipui vote nei thei tawh phawt chu electral roll-a inziaklut vek tur leh vote thlak ngaipawimawh tura sawmin, vote thlak hmanga sawrkar inrelbawlnaa tel tum theuh turin a chah.
National Voters’ Day hmannaah hian chief election commissioner of India Rajiv Kumar thuchah ngaihthlak a ni a. He ni denchhena thutiam sawirual niin, chief electoral officer Mizoramin Madhup Vyas chuan thu a sawi bawk.
Aizawl district-a booth level officer (BLO) hna thawk tha zual 12 thlanchhuah hnenah lawmman hlan a ni.
National Voters’ Day hi 1950 January 25-a din Election Commission of India (ECI) din champha pualin kumtin January 25-a hman thin a ni a. Voter-te hnena inthlan kaihhnawih pawimawh hrilhhriatna atan hman thin a ni. Kumin thupuiah “Vote thlak tluk a awm lo, vote thlak ngei ka tum e’ tih hman a ni.
Kumin January 6-a final electoral roll 2025 tlangzarh taka tarlan danin, Mizoramah vote nei mi 8,69,813 an awm a. Heng zinga 4,20,888 hi mipa niin, hmeichhia 4,48,925 an awm.