Hnehna kawngah Barcelona an kirleh

Hnehna kawngah Barcelona an kirleh
La Liga bika game li chhung ngawt an chak zawh tawh loh hnuin Pathianni zan khan Barcelona chuan hnehna boruak an hip leh thei ta a, an inkhawlkhawm rei tawh bawk a, Lluis Companys Olympic Stadium-ah 7-1 ngawtin an mikhual Valencia an sawp.
Chak lawm chaka tuihal huam huam tam zawkna mipui 45,312 hmaah tan atanga minute thum a liam hmain Frenkie de Jong chuan thawhrah atangin goal hmahruai a thun a; tuibur hmuam da awm velah Ferran Torres chuan Alejandro Balde siamsak atanga khung belhin, minute 14-ah Fermin Lopez-a assist hmasa zawk hmangin Raphinha chuan mualneitu team goal thumna a thawh ve leh.
Catalan team an phur tulh tulh a, chawlhlawk hmain Raphinha goal tur siamsaktu Spain midfielder Lopez chuan goal hnih a khung thawt a, half time-ah home team lamin singa fai tehrengin hma an hruai hman!
Second half tir lam minute 59-ah Hugo Duro chuan mikhual goal neihchhun ni zui ta khung ve bauh bawk mah se kumin tualchhung league-a chak harsat Catalan team hian an goal phai an chhungkhat leh thuai a, he goal hi minute 66-ah substitute Robert Lewandowski tihluh niin, goal hnih thuna assist vawikhat nei tawh Fermin Lopez siamsak a ni a; ti hian, Pole hian league kal laiah goal 17 a thun tling ta a ni.
Chutah an chetchhiatna belhchhah turin Valencia player Cesar Tarrega talbuai pheng chuan an lam goal-ah tilut palhin, Barcelona goal sarihna!
Tun kha nikum August thlaa 7-0 zeta Real Valladolid an sawp hnu La Liga bika Nou Camp club chak chian leh ber tum niin, karliamta Thawhlehni Champions League-ah mai khan Benfica lakah 5-4 hnehna an chang tawh bawk.
Barca hian Hansi Flick-a hnuaia inelna hrang hrang game 32 lek an hmachhawn tawh atangin goal 100 zet an khung tling tawh a, Flick hi kum 1959 daih tawha match 31-a goal 100 ngah tling Helenio Herrera hnu lama goal century siam rang ber a ni.
Pathianni zana an point thum hlawhchhuah hmangin point 42 neitu Barcelona khan table-a pathumna luah chungin hmahruaitu Real Madrid chu point sarih chauhin an thlau ta a; an chung chiaha pahnihna Atletico Madrid lakah point thumin an hniam thung.
West Brom head coach Carlos Corbera hnuaia talbuai thuk telh telh Valencia erawh point 16 hum chungin a mawngphah chung chiahah an thu thung a; inelna hrang hranga an game khelh hnuhnung vawingaa an vawikhat tlawmna a ni.
Barcelona chuan Champions League last-16 lut chiang tawh chungin naktuk, Nilaini zana an league stage match hnuhnungber turah Serie A club Atalanta an mikhual zui leh dawn a ni.
Pathianni zana Valencia an mikhualna Lluis Companys Olympic Stadium kha Nou Camp an siamthat chhung atana Barcelona lamin 2023-24 season atanga home stadium atana an hman tan niin, Spanish Civil War laia Catalonia autonomous region minister hmasaber Lluís Companys hmingchawia phuah a ni.
1992 Olympics lai khan mipui 67,007 lenna ni mah se tunah tak hian seat 54,367 awmin, Spain rama stadium parukna leh Catalonia bial bika a lian ber dawttu a ni.