ZPM-in chuhtu nei lo

ZPM-in chuhtu nei lo
Serchhip district-a Chhuanthar Tlangnuam village council-ah party dang chuhtu awmloin ZPM party candidate 5 chu tlinga puan an ni a; Neihloh leh Hmunzawlah hmeichhe tana seat hauhsak bikah chuhpuitu nei loin ZPM candidate tlinga puan an ni bawk.
Serchhip district-a VC inthlanpui neih turah Thawhlehni khan district election officer, bawrhsap Paul L Khuma chuan chanchinbumite a kawm a. An district-ah muanawm taka inthlan kalpui a lo ni tawh thin bakah mipui awm zat atanga chhuta vote tla zat sang ber pawl an nih thin chu tun tum VC inthlanah pawh Mizoram puma vote tlak thatna ber district nih tumin voter turn out target-ah zaa 90 tal tlin ngei tuma tan la turin thuthar thehdarhtute leh mipui thawhhopuiah a sawm tih a sawi.
DEO sawi danin, tun VC inthlana chuh tum hming pe 698 zingah general seat chuhtu mi 524 awmin, 174 chuan reserved seat an chuh a; candidate zawng zawng hian endikna paltlang vekin candidate tura pawm an nih hnuah an zinga mi 11 chu an inhnukdawk a. Chuhtu awm loa tlinga puan mi 7 an awm a ni. Inhnukdawk leh tlinga puan an awm tak avang hian tun tuma VC inthlanpuia chuh tum zat hi 698 atangin 680-ah an tlahniam ta a ni.
State Election Commission-in hun a hawnsak angin, electoral roll hi January 27 thleng khan tihdanglam a la ni a. VC inthlan atana final roll-ah hian Serchhip district-ah voter 50594 awmin, final electoral roll tlangzarh tak aiin 151-in an pung a ni.
Serchhip additional SP Saidingliana Sailo sawi danin, Police Headquarters lamah police an dil belh a, guidelines-in a sawi piahlamah Quick Response Team an din a, duty pawh ruat tura bituk zat aia tam an ruat.