Kum 14-16 zinga 76%-in social media khawih nan smartphone hmang
Kum 14-16 zinga 76%-in social media khawih nan smartphone hmang
India-a zirna kaihhnawih report tihchhuah tharah naupang kum 14 leh 16 inkar 76% chuan social media khawih nan smartphone an hmang a, 57% chuang hretin zirna thil atan an hmang thung.
Kum tina tihchhuah thin, Annual Status of Education Report (ASER) chu Thawhlehni khan tihchhuah a ni a, hetah hian thingtlanga thalai zawkte chu digital technology-in a tuam na telh telh tih a lang.
ASER 2024 hi ram puma thingtlang in tin luhchilha neih niin India-a thingtlang district 605-a khaw 17,997 tuam a ni a, naupang 6,49,491 dinhmun hriat a ni.
Tlawmngai pawl, Pratham-in zir chianna hi kalpuiin tual chhung pawl leh zirna inten an buaipui.
Naupang kum 14 leh 16 inkar zinga 57% chuang hretin smartphone chu zirna kaihnawih atana an hman laiin 76% chuan social media khawih nan an hmang.
Heng rual naupang zinga 82% chuang chuan smartphone khawih dan duhtawkin an thiam a, a thiam zingah hian mipa naupang aiin hmeichhia an tam zawk.
Zirna atana smartphone hmang zat erawh mipa leh hmeichhiaah a inzat a. Social media khawih nana hmang erawh mipa an tam zawk a, mipa 78.8% leh hmeichhe naupang 73.4% an ni.
Kerala chu naupang zinga zirna atana smartphone hmang uar ber niin naupang 80% chuangin an hmang a, hetih rual hian social media khawih nana hmang pawh 90% chuang niin an sang ber tho bawk.
ASER-ah hian naupang kum 14 leh 16 inkar zinga smartphone nei chu an la tlem hle a, an kum a tam hret hnuah chauh an nei tih a lang.
Report-ah hian kum 2018 kha chuan thingtlang chhungkua 90% dawnin mobile phone pangngai an la hmang a, smartphone hmang chu 36% chauh an la ni.
Kum 2022-ah chuan smartphone nei chhungkua hi 74%-ah kaiin kuminah phei chuan 84% an tling tawh.
Report chuan Covid-19 len lai khan smartphone hi naupangten an zirlaibu, an zirna thil tih nan leh zirna video en nan an hmang nasa hle a. Hei hi sikul kai theih loh vanga hmang nasa an ni.
Hripui leng a reh a, dan pangngaia sikul kal a nih leh hnuah naupang zingah digital media hman hi kalphungah an nei ta zel a ni.