Ei sual vangin AR pathum thi, damdawi inah pahnih awm

Ei sual vangin AR pathum thi, damdawi inah pahnih awm
Leimaram Waroiching, Kangpokpi district, Manipur-a awm mek Assam Rifles sipai pathum chu thil eng emaw ei sual vang ni ngeia hriat vangin an thi tih Thawhlehni khan thuneituten an sawi.
Thi pathumte hi Regional Institute of Medical Sciences (RIMS), Imphal-a Thawhtannia dah luh sipai panga zinga mi an ni a, an zavai hian ei sual vanga awm thin dan angin an awm a, an luak nasa hle.
Thite hi Lance Naik Rama Shankar (59), Ballia district, Uttar Pradesh; Havildar Umesh Kumar (49), Buxar district, Bihar leh Warrant Officer (GD) Phoolchand (56), Dehradun, Uttarakhand te an ni.
Shankar-a hi Thawhtanni khan a thi a, Kumar leh Phoolchand te hi Thawhlehni zing khaw var hma deuhvin an thi thung a. An ruang hi endik a nih hnuah an chhungte hnenah thawn a ni ang.
Damdawi ina la awm pahnihte hi Rifleman Ghanashyam Singh (48), Atrarson, Chhapra district, Bihar leh Naib Subedar (GD) Gagan Singh (59), Haridwar district, Uttarakhand an ni a. An dinhmun hi ngaihtuah awm a ni lo tih damdawi in thuneituten an sawi.
Doctor chuan thil ei sual vang nia ngaih theihin damdawi ina an luh lai hian an awm a, an thih chhan erawh an ruang endik a nih phawt loh chuan a sawi thei lo.
Manipur police officer pakhat chuan paramilitary force hnenah hian heng sipai thite zu in um chu an kuta hlan turin an ti.
AR officer erawh erawh chuan zu tha lo in vanga thi nia an ngaih loh thu a sawi a, thil ei sual vang zawk niin a sawi a. An panga hian Thawhtanni khan an awm a nat avang leh an luak avangin damdawi in panpui an nih thu a sawi.
Police chuan thih dan pangngai lova thi kaihhnawihah thubuai an ziak lut a, an chhui zui mek.