Service rivalry nasa lutuk hi tha kan ti lo- Chief minister

Sawrkar hnathawk zingah service hrang hrang inkara inerna leh elrelna awm nasa lutuk chu tha an ti lo tih chief minister Lalduhoma chuan a sawi. Ningania minister Lalrinpuii department chan, Health & Family Werlfare leh Social Welfare & Tribal Affairs hnathawh an thlirhonaah chief minister chuan, sawrkar thuruk vawn kawngah dan zawm turin sawrkar hnathawkte a chah a. Sawrkar hnathawk pawl thenkhat mahni pawl hamthatna tur dapa nasa taka sawrkar nawr ching an awm an remti loa, dan a ni lo tih a sawi.
“Service rivalry nasa lutuk hi tha kan ti lo. Duhsak bik kan nei loa, ram tana tha chu kan ti zel dawn,” a ti.
Kalphung thara kal chho zel an ni tih sawiin, “Kan kalphung thar hian in lo kal dan tawh sa kha a rawn nek fo dawn. Inthlakthleng ngam department ni vek turin department zawng zawng ka chah. Hma kan lakna turah ‘a theih loh dan’ dap loa, a theih dan dap hram hram zawk turin kan beisei che u,” a ti.
Sawrkar damdawi ina engemaw chetsualna, vanduaina a thlenin thil chinchang dik tak mipui hrilhhriat ran zel a tha tih chief minister hian a sawi a. A phenah thil tisualtu an awm phei chuan dan anga hma lak pawh hreh lutuk lo turin a chah.
Hnathawktute (contractor) muan leh thawh chhiat vanga harsatna tibo tur leh project pending nei lo zawnga kal an duh tih a sawi a. A tul a nih chuan contract tihtawp thlenga kal ngam mai turin a hrilh.
“Aikal la kalpui ru an awm leh awm loh khauh taka kalpui mek a ni a. Service Review Committee din a, sawrkar hnathawk chhawr tlak loh dap chhuak a, voluntary retirement scheme hmanga chawlhtir a, chhawrtlak lak mai tha kan ti,” Lalduhoma hian a ti.
Chief Minister thusawi dang:
8 Project thar thehluh tur reng reng Planning department kaltlang veka thehlut tawh tur a ni a, project reng rengin a enkawl zuina dan mumal tak nei zel thei tawh se.
8 CSR tam zawk kan hmuh theihnan leh awmze nei zawka kan hman theihnan Chief Minister Office ah CSR Cell kan din a. CSR diltu zawng zawngin an ni hi hrilhhriat zel nise kan ti.
8 e-office hi kalpui tumin hma kan la chho zel a. Hei hi staff indaih lo tihziaawmnan, mipui tana hnathawh tha zawk leh rang zawk thawhnan a ni.
8 Sawrkar bungrua leh hmanruate tlawm zawka lei theihna tur dan kan ngaihtuah mek.
8 SASCI leh central sponsor hna dang dang, kan thawh ran vanga a hlawkna kan tel theih an awm a, department che muang bik ni lo turin ka ngen che u.
8 Central dawrna kawngah CM Office chuan a tul hun apiangah kan tanpui thei a. Ka zin dawnah zuk sawipui tura min duh apiang min rawn hrilh ula, DO letter ziak tura min duh pawhin min hrilh dawn nia.
8 Contract agreement fel lo vangin sawrkar hi a chan chhe zawkah a tang ngar ngar zel a. Hnathawh chhia, mipui an phun mur murnaah ngei pawh contractor kan hrem ngam lo fo. A pawisa petu (a leitu) a nih angin sawrkar chan tha zawk tura contract agreement ziah zel theih tha kan ti.