INDIA-ah chuan AAP kan la inlungrual reng – Cong MP

INDIA-ah chuan AAP kan la inlungrual reng – Cong MP
Delhi assembly inthlan neih zawh takah INDIA-a tangho zinga mi, Aam Aadmi Party (AAP) leh Congress inkhingin Arvind Kejriwal-a pawhin a tlak phah hial nia sawi a awm mek laiin Congress MP Rajiv Shukla chuan engmah an karah harsatna a awm lo va, eptu tangrual an nihnaah an la inlungrual tih a sawi.
Delhi inthlana an inbeih nasat hle hnuah party pahnih inkarah hian khi awmin INDIA boruak pawh a nghawng nia sawi a awm a eptute hi an la inpumkhat tha a, inthlanpui a awm leh hunah chuan an kal khawm leh vek dawn tih Shukla chuan a sawi a ni.
Shukla hian INDIA tangrual chu Lok Sabha inthlan atana din a ni a, party tinin state inthlanah chuan anmahni duh anga kal theihna turin zalenna an nei a, an inphalsak vek bawk tih a sawi.
“INDIA din a nih khan lungruala Lok Sabha inthlan hmachhawn kha kan tum ber a ni a. State-ah chuan party-ten anmahniin thutlukna an siam thei vek a. Parliament inthlan a lo awm leh ang a, INDIA tangrual chu a awm leh tan nghal mai dawn a ni,” a ti a. “Eptute inpumkhatna chu a la ngai reng a ni,” a ti bawk.
Titi a awm tanna hi BJP-in Delhi inthlana bial 48 laa chiang taka hnehna an chan hnu atangin niin AAP-in kum 10 ro an rel tawhna chu an phet thlu a. AAP hian bial 22 chauh lain Congress phei chuan MLA an nei zo lo va, a zawnin Delhi inthlan vawi thumah bial lak an nei lo tawh a ni.
Congress-in AAP mite vote a la thei a, chu chu an chak loh chhan a ni thei em tih zawhna chu Shukla chuan a nih vek a rin loh thu a sawi a, chutih rual chuan inthlan apiangin vote darhsarh hi a awm ziah tih a sawi.
“Mi tinin an vote hi eng inthlanah pawh an duhnaah an thlak thin a. Party pakhatin party dang pakhat la hek bik riauva rinna chu a dik bik lo vang,” a ti.
Congress leh AAP hian Lok Sabha inthlan khan Delhi-ah tangdunin an chuh a, assembly inthlanah erawh a hrangin an chuh a, hei hi an thatna zawk tura an ngaih ve ve a ni a, result a chhuah hnuah erawh an tuar ve ve zawk nia ngaihna a piang mek.