An inzirtir mek karah Chinaa innei an tlahniam tho

An inzirtir mek karah Chinaa innei an tlahniam tho
Thuneituten an mipui zat tlahniam mek zelah an thalaite inneia fa nei tura an aupui lai mekin China-ah chuan nikum khan innei an tlem leh hle a, a hma kum aiin a let nga zetin an tlem zawk.
Nikum khan tuak maktaduai 6.1 chuang an innei a, a hma kum kha chuan maktaduai 7.68 an innei niin Ministry of Civil Affairs chuan a chhinchhiah.
China-ah hian inneih leh chhungkaw din hi hun rei tak ata tawh fa enkawlna leh zirna man a to em avangin miin an duh loh phah a. Hei bakah hian tun hnaia an ram economy a than viau laiin university graduate-te tan hna a vâng a, hna nei lova inneih hreh an pun vang a ni bawk.
Chinese thuneitute chuan inneih uara fa pawh nei turin an thalaite an zirtir thar nasa hle thung.
China-ah hian mihring tluklehdingawn 1.4 awmin khawvela mihring tam ber pahnihna la ni mah se an upa chak hle.
Kum 1980 atanga 2015 chhunga fa pakhat chauh neih an kalpui avangin kum tam tak chhung chu nau piang zat bi an tlem em a. Kum 10 emaw lek lo awm leh turah hian Chinese maktaduai 300 vel, US-a cheng zawng zawng zat zet chu an upat avanga an hna atanga chawl mai tawh tur an ni.
An rama hna thawk thei rual tlahniam tur dan nan hian nikum atang khan thuneitute chuan college leh university-ah ‘love education’ an kalpui tan a. Hetah hian inneihna, inhmangaihna, fa neih leh chhungkaw din duhawmna lam an inzirtir a ni.
Nikum khan nau piang zat bi erawh a hma aiin tlemin a sang hret a, hei hi hripui len hnua an inawm pawlh leh rah a ni pakhat a. Hei bakah hian kum 2024 kha Chinese zodiac year of the dragon a ni a, hemi kuma nau piang hi chu an tum a ruhin vanneihna nasa tak keng bika an ngaih vang a ni.
Nau piang hi pung ve hret mah se a zawna a kum thum nan an ram mihring zat chu a tlahniam leh tho a ni.
Nikum khan tuak maktaduai 2.6 chuangin inthenna lehkha an thehlut a, a hma kum aiin 1.1%-in an tam zawk a ni.