Kar tawp football hnuhma

On Feb 13, 2025 6 0

Kar tawp khan Europe a tualchhung league lian pali: Spanish La Liga, Italian Serie A, German Bundesliga leh French Ligue khelh chhunzawm a ni a. England lamah chuan FA Cup fourth round khelh a ni ve thung. Kar tawp football hnuhma langsar zual kan hrut kual leh thuak thuak ang.
Spanish La Liga
Pathianni zan khan FC Barcelona chuan Mimuala an khingpui Sevilla chu 4-1 in an hneh a, hmahruaitu Real Madrid nen an inkar an tizim. La Liga-ah champion tuma inelna boruak a nung thar viau a, Pathumnaa awm Barcelona leh hmahruai mektu Real Madrid te inthlauhna chu point hnih chiah a ni. Sevilla an hneh tum hian Raphinha chuan goal a thun. Raphinha hian season kal mekah Barcelona tan inelna hrang hrangah goal 24 a thun a, assist vawi 13 zet a nei tawh bawk. Raphinha hi Europe a league lian zual pangaa khel zingah goal a inrawlh tam ber dawttu a ni a, a chungah hian goal 44 a inrawlh tawh Mohamed Salah chiah a awm.
FC Barcelona tan hian Robert Lewandoski a chetha chhunzawm zel a, season kal mekah goal 19 a thun tling der tawh. Lewandoski hi Lionel Messi hnu lamah La Liga game hmasa 22-a goal 19 thun leh thei hmas ber a ni.
Italian Serie A
Table-ah pathumnaa awm mek Atalanta tan Mateo Retegui a chetha chhunzawm zel. Retegui hian Serie A a hmachhawn vawi 24 atangin goal 20 a thun tling der tawh a. Atalanta payer zingah hetiang ti thei hmasa ber leh awmchhun a ni.
German Bundesliga
Champion lai Bayer Leverkusen chu Mimual (away) ah an khel tha chhunzawm zel a, tlawm nei lovin vawi 27 zet (W20, D7) an kal tluang tawh a, Bundesliga-a an club record an nihrual. Leverkusen hi kum 1985-1992 chhung khan Udo Lattek enkawl la hnuaiah Mimualah tlawm nei lovin vawi 27 an lo kal tluang tawh. He record hi Alonso hnuaiah khum thei dinhmunah an ding mek.
Team lian Bayern Munich tan forward Harry Kane chuan penalty atangin goal 9 a thun tling der tawh. Kane hi kum 25 zet hnuah Bundesliga-ah season khatah penalty atanga goal kua thun thei hmasa ber a ni. Bundesliga-ah hian season khatah penalty atanga goal thun hnem ber chu 1980-81 season-a goal 10 thun Paul Breitner a ni a. Harry Kane hi Paul Breitner record khum thei dinhmunah a ding mek. Kane hian Bayern a zawm hnuin penalty vawi 20 zet a pet tawh a. Penalty a pet zawng zawng hi pet goal vek nghe nghe a ni.