President’s Rule duh lohna lantir, tribal-ten tha ti thung
President’s Rule duh lohna lantir, tribal-ten tha ti thung
President’s Rule-a Manipur dah a nih hnuah Imphal Valley-a hmun hrang hrangah duh lohna lantir chhunzawm zel a ni a. Hetih lai hian Kuki tamna, tlangram district-ah erawh chuan sorkar laipui thutlukna hi an lawm hle thung.
Meitei tamna phaizawla mipui pawl hrang hrangte chuan sorkar thutlukna duh lovin hlip leh ngei tura nawrna an lantir nasa hle.
Coordinating Committee on Manipur Integrity chuan President’s Rule hi hlih leh an phut a, sorkar laipui chu state sorkar pangngai din leh turin an phut.
Hetih lai hian Kuki hnam MLA 10 chuan sorkar thutlukna hi lawmawm an tih thu an sawi thung.
Pathianni khan Thumbutgong Brahmapur huam chhung, Imphal East-a hmeichhe pawl hrang hrangte pungkhawmin an au rual a, state pangngaia dah let leh turin sorkar an phutna an lantir.
An zinga mi, BM Roji-i chuan an state-a politics chiri chuan mipui a tithinrim a, hrehawm an ti hle tih chanchinbumite hnenah a sawi a. Meira Paibi pawl dangte pawhin sorkar laipui thutlukna hi an duh lo tak zet tih a sawi bawk.
Kuki-Zo-Hmar hnam atanga Manipur MLA 10-te chuan sorkar laipui thutlukna thlirin muanna kawng an zawh theih tan an beisei thu an sawi thung a. Heng Manipur tribal MLA-te hi a hma pawha tribal chenna tur inrelbawlna hran siam emaw, union territory hran emaw neih mai phuttute an ni.
Tribal MLA 10-te zingah hian BJP pawh pasarih an awm a, sorkar laipuiin Manipur assembly che thei lova a siam rih chuan an state-a politics chiri tak ching fela a tul ang zela inrawna muanna kawng an zawh tan theih an beisei tih an sawi a ni.
Tar lan tawh thin angin Manipur-ah hian May, 2023 atang khan hnam hnih, Meitei leh Kuki intibuaiin tharum thawhna thlengah mi 200 chuang an thi tawh a, mi sang telin an in leh lo an chhuahsan phah tawh.
Pathianni hmasa khan Chief Minister N Biren Singh chuan bânna a thehlut a, a tuk atanga tan tur assembly session pawh thulh nghal a ni a. Rorel lai, BJP chuan a aiawhtu tur an hmuh mai theih loh avangin Ningani tlai khan President’s Rule-ah dah a ni ta a ni.