2024-ah Lungleia lirthei chesuala nunna chan 14

Kum 2024 atanga 2025 February thla kal mek inkarah Lunglei district-ah lirthei chetsual avanga nunna chan mi 14 an awm a, hliam 18 an awm.
Mizoram Road Safety Council-in kumin February hi lirthei chetsualna laka himna atana fimkhur tura inzirtir uar thla – Road Safety Month atan a puan a, Thawhlehni zing khan Lungleiah pawh additional DC Rochuangkimi Khenglawt hoin hawn a ni.
Lunglei DTO office report-a a lan danin, nikum chhung khan Lunglei district-ah lirthei kaihhnawiha dan bawhchhia man leh chawitir mi 426 an awm a, hemi atang hian Rs. 6,95,000 hmuh a ni. IndiaRAP (India Road Assessment Programme) portal-a chhinchhiah chinah lirtheia chetsualna tum 40 leh IndiaRAP portal-a chhinchhiah bakah tum 18, a vaiin lirtheia chetsualna tum 58 a thleng a ni.
Lunglei Police chhinchhiah danin 2024 January atanga kumin February thlengin Lungleiah lirtheia chetsualna tum 18 a thleng a, mi 14-in nunna an chan bakah 18-in hliam an tuar. Lirthei chesual hi two wheeler 6, three wheeler 2 leh four wheeler 10 an ni.
Nikum chhung khan traffic dan bawhchhia mi 1557 (two wheeler 1003, three wheeler 93 leh four wheeler 461) man an ni a, an sum chawi tlingkhawm chu Rs. 19,51,700 a ni. Kum 2023-a chawitir tlingkhawm cheng nuai 23 chuang nen khaikhinin dan zawm kawngah hmasawnna a awm nia ngaih a ni.
Lunglei Police hian lirthei khu chhuahna siam danglam (modified exhaust) an man sa chu court phalnain tum hnih an tichhe tawh a, a vaiin 70 vel tihchhiat ni tawhin, tihchhiat tur man sa 10 vel a la awm. Modified exhaust veh hna hi an la kalpui reng a ni.
Road Safety Month kalpui chhungin traffic rules inzirtirna buatsaih a ni tawh a, Lunglei Govt College NCC nen inkawpin lirthei tlan thlithlai (joint duty) tum a la ni.