Hnehna nena a chung ber luah chho Barca

Hnehna nena a chung ber luah chho Barca
Pathianni zanah sikhat faia an mikhual Rayo Vallecano hnehin Barceona chuan Spaniah La Liga table-ah an elpui lian ber Real Madrid chu goal difference hmangin an lehpel ta.
Estadi Olímpic Lluis Companys inkhela goal awmchhun leh mualneitu team chakna goal awmchhun ni zui ta hi first half penalty atanga Robert Lewandowski chhuihluh niin, season kal laiah goal 32 a thun tling ta!
Kartawp Inrinni inkhel lamah an chunga awm Madrid club pahnih an chak zawh loh ve ve avangin Barcelona hian hmahruai theihna hun remchang nei chungin Vallecano an mikhual a, an chak chuan nikum December thla hnu lama La Liga table-a hma an hruaileh vawikhatna tur a nih avangin a khelh danah pawh an fimkhurin, an nervous deuh tih a hmuh theih a, mahse, Lionel Messi awm loh hnua Catalan team chhantu lian rawn ni chho zel Pole Lewandowski bawkin a hun takah goal pawimawh a khung a, kartawpa 1-1 draw ve ve bakpel zo lo Real Madrid leh Atletico Madrid hmakhalhin, Hansi Flick-a team-in hma an hruai ve leh ta nge nge a ni.
Video assistant referee (VAR) endik hnua hmin ta penalty atanga Poland striker goal kha tun season league-a a goal 20 thunna chiah niin, La Liga top scorer nih inchuh meknaah hma a sawn zel.
Rayo midfielder Pathe Ciss khan box chhungah Inigo Martinez a pawt tlu a, kha thil thlen lai khan khelmuala tlu Barcelona centre-back kha goalkeeper Augusto Batalla hmaa ball awm han chang pha tur pawhin a hnaih pha lo a, mahse, VAR endik hnuah penalty-a ham a ni.
Khati ang deuh bawk khan mikhual Rayo Vallecano lamin penalty an beisei ve bawk a, mahse, Ciss-a tlu chu referee-in penalty a pe lo a, an thinrim hle nghe nghe.
Kha lo pawh kha inhnial theih thil dang thleng awm bawkin, through ball atanga Jorge de Frutos-a’n Barca goal-veng Wojciech Szczesny dan phak loh goal a thun chu offside tia hnawlsak niin, goal luh lai bawl vela offside position-a striker Randy Nteka lo ding chu ham niin, Rayo lawm lohna a thuahhnih!
Rayo counter-attack atangin De Frutos bawk hian mikhual siphurh sutna hun remchang hmu leh mah se goal kham chungah a tauhchhuak hlauh a, Nou Camp club an him leh hram a ni!
Hansi Flick-a team khan league match 14 chiah khelh tur la awmah point 51 hmuin, an lehpelh tak Real Madrid nen point inang nei mah se goal difference-a an san zawk avangin hma an hruai a; pathumnaa chhuk ta Atletico lakah point khatin an sang.