CONSUMER HUAISEN SAIA NEN..

Lallunghnema
Charity Lodge
Cont: 9862288182

Consumer Huang chhiartute chibai ka buk a che u.
Ka article hi mipui hriat zauna atana zirtirna lam hawi a ni a, vantlang mipui khawsakna atana thil tul leh pawimawh tak a ni. Chuvangin a ngaihnawm hran lo va, mahse, chhiar fuh vek vek chuan an chhiar an chhiar mai a ni âwm e. Kan thian pa dawra thawk thin, Chatuan ram min pansan ta Pu Daniala phei kha chuan Mipui Chanvo tih lehkhabu ka ziah kha vawi 3 lai a chhiar chhuak tih thu min hrilh nghe nghe a ni. Chuvangin he ka article hi Pu Daniala hriat reng nan ka hlan a ni.
Mipuiin kan dikna leh kan chanvo kan hriat loh avangin thil tul lovah kan buai phîli fo va. Hah lohna turah kan hah phah a. Sum leh pai nasa takin kan sên phah thin a ni. Consumer-te hian kan chan tur kan chan loh avangin kan tuar nasa hle thin, tih hi thu dik zik tluak tak a ni. Zêp thu a cheng lo ve, Gas chungchangah pawh hian LPG Control Order leh Marketing Discipline Guideline-te a awm a, gas hmangtute tana buatsaih a ni. He LPGas Inkaihhruaina Dante hi kan chhiar chuan Hot-plate (a thuk) hi Oil Company-tâ (property) a ni lo va. Hmun danga mîa lei theih a ni. ISI mark a nih phawt chuan a tawk reng a ni. Miin Gas Connection a tihnaah Hotplate hi inlei luihtir hi khap a ni. He thil hi ka sawi zing lutuk tawh a, a sawt mawh em em si a ni. Mahni tana tha tur pawh hre chang lovin kan luhlul a, kan inti changkang a, kan intihre ve ngawt a. Eng ruai kan ni si lo. Mizo mipuite hian kan tana thil tha kan ban phak reng si hriat duh loh a mênah pawisa tam tak tak sengin a thuk kan lei thin a nih hi! Heng avang hian kan tuar a, mahse, kan tuarna hi kan hre thiam ngang si lo a ni. Gas lak dawn a, tlangau au rual a, kan phu suau suauva, kan intlar pût chhung chuan Hnam hahthlak tak kan ni reng dawn a ni. Gas Home Delivery hi a nihphung a ni! tih hi in chhungkuain lo bye heart rawh u.
Ka la sawi duh fan… MRP leh Expiry Date kan ngaih thah avangin kan buai phah a, tul lovah sum tam tak kan sen phah thin. Mi ngaihsam tak, “Ni mai teh se” tih ching kan ni a. Fing kan intih hi kan mawl vang a ni tih hi zêp chi rual a ni lo ve. Hetiang mi kan nih niai nuai rual hian mi fel mi huaisen an lo awm leh thin a. Anni ho zarah hian kan dam khaw chhuak mai mai chu a ni a. Mahse, bei erawh a la dawng lo ve. Tuna kan rawn sawi mek pawh hi mi pakhatin kum eng emaw zat kal ta a, Consumer Forum (tunah chuan Commission tih a ni tawh -llh) a, ka u Hawla te nena kan awm laia thil thleng a ni a. Ka han her lum lawk a ni.
Tin, heti hi a ni a, Chawlhkar khat liam ta mai khan Restaurant mi pakhatah a hming Pu Saia leh a thianpa te nen kan inkâwm hlauh a. Vawi tam inhmuh tawh thin ang maiin kan titi bawrh bawrh a. Consumer Right pawimawhziate chu hahipin kan sawi a. Anni thian dun, Pu Tluanga leh Pu Saia te pawh hian Consumer Awareness pawimawhzia an uar hle a ni. Consumer Right kan sawi chhuah zarah Saia chuan an tawnhriat(experienced with consumer right) hetiang hian min hrilh a.
“Kum 2008 vel khan kei pawhin Consumer Court-ah Complaint ka theh lut tawh a. Thiam ka chang nghe nghe a ni. Pu Hawla President a nih lai kha ni tain ka hria. Pu Hnema pawh hi i tel ve tlatin ka hria. (Kei chuan Forum member ka nih ve lai a ni ang a, ka lo ti a-llh) |um khat chu petrol coupon(litre 20) ka nei a. Petrol pump pakhata kalin petrol lak ka tum a. Mahse litre 5 chauh ka scooty-a ka thun theih avangin a bak litre 15 man petrol coupon ka dil a. Coupon min pek theih loh avangin litre 15 man tling lo a pawisa min pek a tum lui tlat a. A kim lova pawisa dawn ka duh bik si lo va. Thawktu pakhat chuan “Chutiangin a pawisa a kan pekte chuan a full-in kan pe ngai lo, cheng eng emaw zat ‘cut’ a ni thin, a ti bur mai a. Kei chuan a vaia min pe turin ka ti tlat mai a. Mahse, min pek duh loh avangin ka intiam ang ngeiin Consumer Court-ah he pa hi ka han khing ta a. Consumer Court kal a ngai zing si a. A ning hle a, a nin thu chu a sawi, a sawi ta mai a. Kei chuan, a tira ka dil ang che u khan min tihsak ula chuan court kal a ngai lo tur a nia. Ka ti mai a. Tichuan, Aizawl District Consumer Forum chuan ka khingpui pa chu thiam loh a chantir ta a. Rs. 1000 chuang vel ni tain ka hria, an chawitir ta a ni” tiin.
Hetiang case hi ‘unfair trade practice’ a ni a. Dan bawhchhiatna a ni reng a ni. Pu Saia hi a entawntlak ka ti hle mai. Ani ang hi mi huaisen dik duh leh tan tlat hi kan mamawh a ni.
Consumer Protection Act-ah hian complaint theihna kawng hrang a awm a. Thil hralhtu rinawm lo te hrem theihna dan tha tak kan nei a ni. Heng deficiency in service te unfair trade practice te, spurious goods te, restrictive trade practice te hi kan hriat a tul hle a ni. Inbumnate, intihdernate, dawt sawi te hi sumdawng tam tak hian an hreh lova. Hengho lakah hian kan fimkhur tur a ni. I fimkhur loh thin em avangin i tuar a, i uluk loh avangin harsatna i tawk thin a nih kha. I bazar khan ti mai mai suh. Sum thawh chhuah a harsa si, tul lo leh chuangtlaia pawisa i khawhral mai mai loh nan i ke pen tin kha veng tha la, i bân pawh khuah khirh ang che.