Aston Villa in Liverpool an chelh

February 19, Nilai zan khan English Premier League-ah inkhel pakhat a awm a. Inkhel ngaihven hlawh takah Aston Villa chuan hmahruaitu Liverpool an celh a, 2-2 in an inhnehtawk. Villa laka chak zo lo Liverpool hian point 8 in hmahruai mek mah se an hnuai chiaha awm Arsenal aiin an khel tam zawk thung a, champion tuma inumna boruak a nung thar leh zual. Liverool hian Manchester City an hmachhawn zui leh nghal dawn a, fiahna hautak an hmachhawn zui leh zat ang.
Table-a hmahruaitu Liverpool hi Arsenal nen an inkar tihzau tumin Villa Park-ah an leng lut. An len luhna mualah bul tan tha thawkhat viau mah se tlawm zawkah an tang teuh hle. Si phur chunga chawlhlawk an hman hnuin Alexander-Aronold goal thun hmangin tlawm an pumpelh thei hram a, point khat an hmu.
Villa Park-a inkhel hmuhnawm takah Liverpool in mualneitu an nawr bet nghal a, hlauhawm an siam deuh mawlh mawlh. Beisei angin goal thun hma thei lo mah se Aston Villa defender Andres Garcia chetsual an hrem a, goal an thun ta nge nge. Reds tan hian season kal meka chetha tak Mohamed Salah chuan minute 29-naah Diogo Jota siamsak tha tak atangin hmahruaina goal a thun. Salah hian EPL season kal mekah goal 24 a thun tling ta a, top-scorer a nihna a tihzau zel. Aigupta tlangval Salah hi season kal meka goal 39-ah zet a inrawlh tling bawk a, season a hmang tha vet vet hle.
Goal an chhuah hnuin Aston Villa an nung tha leh zual a, an si phurh sut ngei tumin tan an khawh. Chawlhlawk dawn tep minute 38-naah Youri Tielemans chuan lei hrulah a pet goal a, an si phurh a sut. 1-1 a nih hnuin goal dang a luh belh thei mai lova, inhnehtawk chungin chawlhlawk an hmang ngei dawn niin a lang hman. Hetihlai hian hun pek belhah Villa an che fuh a, minute 45+3-ah Ollie Watkins chuan hma an hruai letna goal a thun. An goal hnihna an thun theih nan Villa hian Liverpool tlarhnung an thiat fuh hle. Thlasik bazar inhawn laia Arsenal in an lak theih tak loh Watkins hi hmun awl laiah a dawkchhuak nawlh a, mawi takin a tak goal zui. Watkins goal thun hmang hian Villa in 2-1 a hmahruai chungin chawlhlawk an hmang.
Chawlhlawk hnu lamah chak mamawh Liverpool an khel tha chhunzawm a, second half tir lamah midfielder chetha chho tak Dominik Szoboszlai chuan goal a thun teuh hle a, goal bar in Villa a chhan hlauh. Uiawm taka an hun tha neih an hlah hnuin Trent Alexander-Arnold a inlar ta thung. Arne Slot-a team te hian fuh zetin an khingpuite an nawr tlang a, Mohamed Salah siamsak atangin Real Madrid in nipui bazar inhawn huna lak an tum Trent Alexander-Arnold chuan minute 61-naah fuh zeta pet goal in an si phurh a sut. Liverpool in an goal hnihna an thun danah Alexander-Arnold a langsar hle. Fuh taka ball khalhchhuakin an khingpuite an nawr tlang theih phah a. Fing taka Salah ball a pek hnuin Salah atanga let leh hmangin goal a thun a ni a. Bul a tan tha a, a tawp khar tha viau bawk.
Alexander-Arnold goal thun hnuin innawr tawn nasa viau mah se goal dang a luh belh thei tawh lo va, inkhel hmuhnawm tak chu 2-2 in a tawp ta a ni. Villa lakah an chak zawh loh vangin Liverpool dinhmun a him loh phah hret. Reds hian point 8 in hma la hruai tho mah se Arsenal aiin an khel tam a. Manchester City hmachhawn zui tur an nih bawk vangin point hloh thei dinhmunah an ding.