Arsenal in £17.7m an hloh

English Premier League club lian Arsenal chuan 2023-24 season chhung khan revenue £616.6 zet an hmu a. An revenue san ber tumah £17.7m zet an hloh tlat thung.
London hmar veng club Arsenal hi Premier League-ah season hnih chhung pahnihna an ni zawn tawh. 2023-24 season khan Champions League quarter-final an thleng a. Champions League-ah quarter-final an thlen vang hian broadcasting revenue atangin £71.1m zet an la lut a. Matchday revenue atangin £29.1m zet an hmu bawk.
Arsenal mipa team an chetthat rual hian an hmeichhe team te pawh an chechhe lem lo viau. Arsenal hmeichhe team te hi Women’s Super League-ah pathumna an ni a, League Cup-ah an champion bawk. Inelna hrang hrangah an chet that vangin kum 2023-24 season chhung khan revenue atangin £616.6m zet an hmuchhuak. Kum 2022-23 season khan £466.7m an hmu a. Kum hmasa aia an sum lak luh hi 32.1% zetin a pung. Kum hmasa lam aiin an sum lak luh pung hluai mah se Arsenal hian £17.7m zet an la hloh tho thung. Mah se, 2022-23 season khan £52.1m zet an hloh ve thung a. Kum hmasa lam aiin an hloh hi a tlem ve leh duai tho thung.
Season liam taah £17.7m hloh bawk mah se Arsenal hian UEFA in sum hloh phal chin bituk a neih chu an bawhchhiat loh thu an sawi a. Uefa leh Premier League in sum leh pai chungchanga khuakhirhna a siam chu tha taka an zawm theih zel thu an sawi tel bawk. Revenue an hmuh a pung hluai chunga an la hloh ve tho mai hi Arsenal chuan player hlawha an senso a pun hluai vang a nih thu an sawi. Arsenal in an player mipa leh hmeichhe hlawha an senso chu £234.8m atangin £327.8m-ah a sang chho dawrh a. Hlawh atan an hman punna zat hi 40% zet a tling hial a ni.
Season kal mekah Arsenal hian EPL champion nih tumin tan an khawh a, pahnihnaah an awm leh mek. Champions League-ah last 16 an lut chiang tawh a, champion tumin tan an khawh mek bawk. EPL-a an chetha a, UCL-ah an chetha zui leh a nih bawk chuan an sum lak luh a pung leh hluai tura ngaih a ni.