Film siam lama tuite tan workshop

Film siam lama tuite tan workshop
Information & Public Relations Department chuan film siam lama tuimite tan ni hnih awh workshop Aizawlah a buatsaih mek.
Ningania workshop hawnna hi I&PR minister Dr Vanlalthlana chuan hmanpuiin, film chu khawvel leh India ramah pawh industry changtlung sa tak a ni a, film lama tui Mizo thalaiten khawvel hmuhah an thiamna leh theihna phochhuahna atan leh eizawnna kawnga dinchhuahna atan hmang tangkai thiam turin a chah. Film siam in a ken tel lemchan thiam bakah script ziah, rimawi, thuam inbel tur ngaihtuah, make up chi hrang hrang hmanthiam chu film industry peng pawimawh tak vek a ni, tiin, heng lama tuimite pawhin film industry an hman tangkai thiam a pawimawh tih a sawi bawk.
Film worshop-a tel film siam thin, film siam leh chan lama tuimite leh zirlaite chu thil thar an tangkai pui leh hmasawn pui theih zirchhuak ngei tura chahin, khawvel huap pawha zahpuiawm loh kutchhuak neih tum turin a fuih a ni.
Ni hnih awh film workshop-ah hian Kochi Kolkata Cocktail Production ami Joshy Joseph chu resource person a ni a. Workshop neih chhung hian ‘story telling technique’, ‘importance of sound design’ bakah Grant Thornton atangin ‘UNNATI for Film Industry’ tih thupui hmangin zirtir an ni dawn. Mizo film director, actor, videographer, film siam lama tui leh Mizoram University atangin Mass Communication department zirlaite an tel a ni.