Hriselna atan kea kal tam thatna inzirtir zel

Hriselna atan kea kal
tam thatna inzirtir zel
Mizoram Health Systems Strengthening Project (MHSSP) hmalakna in Lungleiah hriselna atana kea kal runpui, “Walk for Health Walkathon 2025” chu Thawhtanni zing khan neih a ni.
Walkathon-ah hian sawrkar official-te, khawtlang hruaitute, pawl hrang hrang – YMA, MHIP, MUP, MJA adt., kohhran thalai member-te, college NSS leh school zirlaite, naupang atanga upa kum 90 chunglam thlengin mi 2000 vel telin, a telte zinga upa ber chu Saidawla (90) Ramthar Veng Lunglei a ni.
Sub-Committee on Walkathon chairman, addl DC James Miahlung chuan Mizoramin natna inkaichhawn theih loh, non-communicable disease (NCD) vangin harsatna chi hnih – sum leh pai phurrit leh natna phurrit kan tawk mek tia sawiin, NCD natna laka fihlim turin ei leh in uluk bakah taksa sawizawi that a pawimawh tih a sawi. Rilru leh taksa hriselna atan kea kal chu a pawimawh hle tih sawiin, kea kal uar deuh deuh turin district mipui a chah.
Mizoram mipui kan lo hrisel zawkna atan MHSSP hnuaiah “hriselna atan kea kal” (walk for health) tih thupui hmangin district pangaah district level-ah leh khaw 510-ah village level-ah walkathon hi buatsaih tura ruahman a ni a. Lunglei district-ah hian tun tuma neih bakah March 1-4 chhungin khaw 114-ah village council/ local council kaihhruaiin walkathon hi buatsaih tum a ni.