Hlau chungin centre hi dawr lo se – MBJP president

On Mar 4, 2025 13 0

Hlau chungin centre hi dawr lo se
– MBJP president
Mizoram sawrkarin hlau chungin sawrkar laipui dawr lo se, a kalkawng dik taka an dawr phawt chuan centre puihna kan hmuh ngei a rinawm tih BJP Mizoram hruaitu Vanlalhmuaka chuan a sawi.
Thawhtannia BJP State office-a inkhawmah Vanlalhmuaka chuan politic ball atana Lengpui Airport hmang politician an awm tih a sawi a. A kalkawng tur dik zawk chu Union minister rawn zin khan a puang tih sawiin, Lengpui Airport hi Mizoram sawrkar chuan a enkawl zawh loh laiin, Lengpui Airport cheithatna tur sum sawrkar laipuiin an dah thu kan tuallaiah a rawn puang thung tih a sawi.
“Airport hi hlawk zawk leh tha zawka tihchangtlunna sum lak chhuahna turin Mizoram sawrkar hian ruahmanna siam a, a tul anga sawrkar laipui a dawr ngam a ngai. Development hna thawk turin centre hi englai pawhin a inpeih reng a. Mizoram sawrkar hian hlau chungin dawr lo se, a kalkawng dik takin dawr se, chutianga an dawr phawt chuan centre puihna kan hmuh ngei a rinawm,” a ti.
Lengpui Airport kalkawnga Buichali lei dawh mek chu an siam chhung a rei ta hle tih a, kum 2012 atanga sum pek tawh vawiin thlenga siam zawh a la ni lo chu tunhnaia Mizorama rawn kal Union minister of state for Ministry of Road Transport & Highways Harsh Malhotra chuan mak a ti hle a, zawhna a zawt hial BJP Mizoram president hian a sawi.
“A ram chhung mite aimaha pawnlam atanga min veitu an awm hi a zia lo hle. A ram leilung fa leh state sawrkar hi development thawhna kawngah kan inenfiah a ngai a; tun ang renga kan kal chuan kan tu leh fate tan awmna tlak lo leh khawsak harsatna state-ah kan siam mai ang tih a hlauhawm hle,” a ti.
NE state dangten development kawngah min kalsan thui ta viau tih BJP State hruaitu hian sawiin, kan ram mamawh hmuhna atan sawrkar tawh leh sawrkar mekten tih takzetin hma an la tawk loah a ngai tih a sawi. “Sawrkar laipuiah hian Mizoram tana hmasawnna hna thawhna tur a awm a, chu hmasawnna hnathawhna tur chu hai chhuak turin state sawrkara hnar kaitute kan taimak a ngai a ni,” a ti.