Congress a dingchhuak leh dawn – Alka Lamba
Congress a dingchhuak leh dawn
– Alka Lamba
Central-ah leh Mizoramah Congress party a dingchhuak leh ngei dawn tih India ram huapa Congress hmeichhiate hotu Alka Lamba chuan a sawi.
All India Mahila Congress president Alka Lamba hian Mizoram a rawn tlawh a. India ram politics leh Mizoram politics a sawipuinaah Congress party chu a dingchhuak leh ngei dawn tih sawiin, “Mizoramah hian Congress party chhunga hmeichhiate tichak turin ka rawn kal a, hruaitu tha tak an nei a, tawnhriat an nei tha a, hma an sawn hle. Nikumah September 15 – Mahila Congress Foundation Day atangin membership drive kan nei tan a, mi nuai 5-in min zawm tawh. Mizoram Mahila nen pawh kan sawikhawm a, sum leh pai leh khawtlang inrelbawlnaah hmeichhiaten thuneihna kan neih ve dan tur, social justice chungchang kan sawi a ni,” a ti.
Tuna Mizoram sawrkar chu mipui mamawh, a bikin hmeichhiate mamawh pek kawngah hlawhchham hlea a hriat thu a sawi a. Congress sawrkarna Telengana-ah chuan eirawngbawlna gas bur khat Rs.500 in mipuiin an lei thei a. Congress sawrkarna tho Karnataka state-ah chuan hmeichhe tan bus chuan man free, tiin, “Sawrkar hian hmeichhiate tan tih a nei em, tih chief minister ka sawipui dawn,” a ti
Manipur buainaah Prime minister chuan vawikhat mah a la tlawh loa, BJP sawrkar chuan Manipur buaina a ngaihthah hle tih All India Mahila Congress president hian a sawi. Congress chuan remna leh muanna a ngaipawimawh a, Manipur-a thil thleng pawh hi an ngaimawh a, remna leh muanna thleng thuai se an duh a, Rahul Gandhi chuan vawi hnih a tlawh tawh tih a sawi a ni.
Mizoramin ram dang nena inrina Myanmar leh Bangladesh ramri a neih chu sawrkarin a veng tha lo a, Mizoramah nasa takin ruihhlo a lo lut a, hei hi sawrkar hian tihngaihna a hre lo, tiin Alka Lamba hian a sawi bawk.
Amah hi All India Mahila Congress president ni lai a nih bakah Congress thuneitu sang Congress Working Committee member a ni mek a. Kum 19 a nihin Delhi University Student Union president a ni tawh a, NSUI president a ni tawh a, MLA a ni tawh bawk.