Nuggets tan Jokic a vul

Nilaini zing khan NBA Regular season khelh chhunzawm a ni a, inkhel hmuhnawm takah Denver Nuggets chuan harsa takin Minnesota Timberwolves an hneh. Timberwolves laka an chak tumin Nikola Jokic chuan point 61 zet a thawkchhuak a, hei hi NBA match khata point a thawhchhuah tam ber tum a ni. Nilaini zinga inkhel dangah Golden State Warriors tan Stephen Curry a khel tha viau bawk.
Ball Arena-a inkhelh Denver Nuggets leh Minnesota Timberwolves te an inhnehtawk viau a, hun pangngaiah chak zawk an awm thei lo. He inkhel hmuhnawm takah hian Denver Nuggets in bul an tan tha a, quarter khatnaah point 6 in an chungnung. Quarter hnihnaah Timberwolves an khel tha ve thung a, point ngain an chungnung a. Point khata hnufual zawk ni chungin chawlhlawk an hmang tho thung.
Chawlhlawk hnu lamah Timberwolves in bul an tha ve thung a, quarter thumnaah point 6 in an chungnung a, point ngain an khingpuite an lehthal. Quarter hnuhnung berah chak zawk nih ngei tumin an innawr tawn a, inkhel hmuhnawm zawk an lantir. Quarter hnuhnung berah hian point ngain Denver Nuggets an chungnung ve leh chiah a, Timberwolves point hmuh zat, point 112 an hmu ve chiah a, hun pangngaiah chak zawk an awm thei lo.
Hun pangngaiah chak zawk an awm theih loh vangin overtime khelh chhunzawm a ni. Overtime thawkhatnaah point 13 ve ve thawkchhuakin chak zawk an awm thei lo leh. Overtime thawhhnihnaah erawh harsa takin Denver Nuggets an chak thei ta hram a, point khatin an chungnung thei ta hram a. Minnesota Timberwolves lakah hian point 140-139 in an chak zui ta a ni.
Timber Wolves lakah harsa taka hnehna an chan tum hian Denver Nuggets player pawimawh Nikola Jokic chuan point 61 zet a thawkchhuak a. Hei hi tum thum lai MVP lo ni tawh Jokic-a’n NBA match khata point a thawhchhuah tam ber tum niin NBA-ah triple-double puitlin chunga point thawkchhuak hnem ber record thar a ni. Jokic hian point 61 a thawhchhuah bakah ball sawhlet vawi 10 a dawng a, assist vawi 10 nei tling bawkin triple-double a puitlin. NBA-ah triple-double puitlin chunga point thawkchhuak hnem ber ni thin chu point 57 thawkchhuak a, ball sawhlet vawi 13 dawng a, assist vawi 11 nei tling bawk Russell Westbrook record siam a ni a. Kum 2017-a Russell Westbrook record siam hi nilai zing khan Nikola Jokic-a’n a rawn khum ta a ni.
Nilaini zinga inkhel dangah Golden State Warriors chuan point 134-125 in Memphis Grizzlies an hneh. He inkhelah hian Warriors player pawimawh, tum hnih MVP ni tawh Stephen Curry chuan point 52 zet a thawkchhuak a, a chetha hle.