Gas pipeline phum mek enpui
Ministry of Petroleum and Natural Gas bultuma Northeast Gas Grid Project hnuaia Panisagar (Tripura) atanga Sihmui inkar gas pipeline phum mek hnathawh chu Thawhtanni khan FCS&CA leh Revenue minister B Lalchhanzova chuan a hmunah a enfiah.
Indradhanush Gas Grid Limited (IGGL) hotuten minister hi Sihmuia gas dah khawlna tur, ‘receiving terminal’ a hmunah an enpui a. Ram lak leh tihfel chungchanga hma a lakpuinaah lawmthu an hrilh.
Hemi hnu hian Mamitah IGGL leh TNGCL hotute bakah FCS&CA hotute, Mamit bawrhsap leh a thawhpuite bakah Mamit khawtlang hruaitute nen an inkawm a. TNGCL leh IGGL hotute chuan he project hi an sawifiah.
Gas pipe hi km.127 a thui phum niin, Mamit district-ah km 100, Aizawl district-ah km.4 niin a bak chu Tripura state chhungah a awm. A project hi cheng vaibelchhe 491 niin, March 2026 a zawh hman tum a ni.
IGGL hian gas pipeline an phum zawhah Tripura Natural Gas Corporation Limited (TNGCL) in eirawngbawlna gas chu in lamah tui connection anga herh hawn theihin an sem dawn bakah lirtheia hman chi CNG chu station engemawzatah pek tum a ni.
IGGL hotute hian Mamit Luangpawla chainage 87-a pipeline phum mek an lo enpui a. Minister chuan he project tihhlawhtlin hun a nghahhlelh thu sawiin, mahni ina gas herh hawn theih a ni anga, hei hian nasa takin khawsak a tihawlsam bakah mipui tan energy security a pe dawn tih a sawi.
Gas pipeline phum mek enpui
Get real time updates directly on you device, subscribe now.
Prev Post