MSL X – Saron par ti vultu Saron veng tlangval Biakmuanpuia!

MSL X – Saron par ti vultu
Saron veng tlangval Biakmuanpuia!
Saron Veng BC-in a vawikhatna’n Mizoram Super League an khel a, he Sharda University MSL X-ah hian semi-final an sawi ngam, mahse, vanneihna an lamah a tang khawng tawk lova – an beisei loh relegation playoff lamah an inlan thung!
April ni 19, Inrinni zan khan relegation playoff finals ah Champhai BC an hmachhawn a, he inkhelah hian Saron BC hian point 34 zetin hnehna an chang a, changtupa chu Saron tlangval Biakmuana a ni!
Ani hian point 24 zet a score a, 3 pts tum 8 lawih a nei. “Biakmuana” tia Saron fans au thawm a ring tha hem hem hle…
Champhai BC
73 – Saron BC 107!
He inkhela commentator Pu C. Vanengmawia, Zotlang chuan, “Saron vengin 3 pts an ti far zawih zawih,” a ti a – a dik, a la uar tawk lo!
Saron BC hian Champhai BC lamah 3 pts an sur tir, a surin a sur! |um 19 teh meuh mai Saron BC hian 3 pts an thlawh lut a, chu chu point 57 a ni hem!
Saron BC lam atangin Ramthar tlangval inkhel thununtu Hmachhuana (22 pts) a rawn inlan hlawl a, inkhel khai dingtu a ni.
A. Tyagi pawhin point 23 lai a nei thei a, ani hi ball a dawn ruala shoot nghal mai thei zel a ni a, a tangkai fu – MSL XI lamah a hmel hi kan hmu zui lehin a rinawm.
Foreign player Elomni (23 pts) erawh beisei aiin a khel a duap deuh, a sanna erawh an tangkaipui.
T. Lalhriatzela (Tea) thawm daih zan hian tawiawmtu nei tha thin Saron Veng mipui inkhelhna hmunah an thawkchhuak tha bawk a, an veng an chetha zui nen, Champhai BC court chhungah leh pawnah an dah ‘nil’ hneh hle.
An head coach Lana tan best of three series hi hna a awlsam ta.
Champhai BC hi tualchhung player tha Ropuia kawltu an ni a, Saron BC lam chetthat an chelh loh zan hian Ropuia (12 pts) meuh pawh a che ropui lo – a thiam bel 3 pts chhunga luh zeuh zeuh aiin harsa taka 3 pts neih ve phet a tum emaw tih turin a khel!
Tha za leh phur an vai palian Harsh Tomar (10 pts) ball an pe tam tawk lo, ani hian Saron BC palian Elomni a ngam teh lul nen.
An star player DC Franklin (37 pts) a tangulh a, khawi hmunah pawha hlauhawm hi tualchhung tlangval lamin ball pe mai lova rem leh rem lova an lo shoot ve chhen avangin a lungawi lo a talbuai lek lek!
A tawi zawngin sawi ila, Champhai BC hian team huikhawmtu hruaitu tha nei lo zia an pu a, an relegate a nih pawhin an mawh liau liau a ni ang!
Hun harsa leh khirhkhanah chingfeltu an rawn inlar dawn nge, chhuanlam an kawk kual dawn? An defense a pherh tluan parh – point nei chuang bawk si lo tualchhung tlangval lam an inenfiah a ngai!
Head coach Mapuia Zote hian a team bus khalhah hian tanrualna ‘gear’ a hman hun a thleng ta e.
Hoops Mania
Time Out
MSL X-ah hian inkaihhruaina dan (rules) hre ziktluak lo team enkawltu lam te, hnam dang player laka thununna lekkawh tha ngam mang lo te, hnam dang player team aia mimal chetthat khel zawk anga lang te, match official lam thutlukna felhlel deuh leh huaisen thlak tak te, player thinchhe fal leh match official laka tawngkam nei chhe thin tak te, match official inkhel thunun kawnga dem kai bik te, a thlawna inkhel en tuma luh dan phet hisap te, match commisioner-in club tan bik a nei emaw tih theih tura a dinchilh rei bik riau te, MSL board lam thutlukna pawr lai te leh duhkhawp loh lai venthawn nei map lovin The Aizawl Post Hoops Mania chuan kan rawn lipse chho nasa viau dawn – Mizo basketball thanna kawnga hnawk thianfai turin MSL X chawlhkar tawp ber ni thei pualin chibai kan rawn sem e.
“MSL X tluang takin kan nei chho a, finals hial kan lo chuangkai ta. Mizo mipui leh India ram hmun hrang hrang atangin inkhel a hmunah leh Zonet Cable TV Pvt. Ltd. kaltlanga lo chhim thinte’n min hlutsak tih kan hria a, MBBA lam chu ka lawm hle.
“Kan tuina lam hi inang vek hek lo le, Mizo basketball thanna atana MBBA hmathlirte min lo hlutpui chhunzawm a, MSL X finals ngat phei chu a hmun ngeia rawn en vek turin ka sawm takzet che u. Saron BC leh Champhai BC inkhel pawh hi ngaihnep chi a ni lo…” tiin MBBA puipa lam atangin Pu F. Lalhriatpuia (Chaltlang) chuan The Aizawl Post Hoops Mania kaltlangin sawmna a siam.