Sawrkar hmasa ruat retailer leh ruat tharte enkawl dan a inanglo – MNF Vigilance Committee
Sawrkar hmasa ruat retailer leh
ruat tharte enkawl dan a inanglo
– MNF Vigilance Committee
Sawrkar hmasa huna retailer ruat/ thlan te chunga an phut ang kha tun sawrkar thara retailer-te chungah an phut ve lo tih MNF party chuan sawiin, inang khata enkawl turin sawrkar an phut tih an sawi.
MNF Action & Vigilance Committee hotute chuan, ZPM sawrkarin ration buk dik tak pek a tiam a, chutiang tur chuan sawrkar hmasa hunlaia retailer ruat/thlante hnen atangin an ration lak apiangin buhfai bag rihna pawh it-in an chhuhsak zel a, tunah anmahni party mi leh sa, an duhzawng an ruat/ thlan hnu ah buhfai bag, sawrkar hmasa thlan retailer-te atanga an chhuhsak kha an chhuh ve leh si lo tih an sawi.
“Sawrkar hmasaa retailer thlan hnen atanga buhfai bag rihna lehzel laksak chunga buhfai buk tling leh dik taka pe tur leh zing dar 6 atanga sem tan a, nitin buhfai sem tura an phut ang khan tuna an party miten retailer hna an thawh hnu hian phut ve zel turin sawrkar kan phut a ni,” he Committee chairman David R Lalsawmtluanga chuan a ti.
RTI Act hmanga information an hmuh danin, March 2025 thleng khan Mizoramah ration card 290868 a awm a. Ration card khulna tur hi Rs.20 ni tura bituk a nih laiin, khaw hrang hrangah an duh zat zata khul tir an ni tih an sawi. Champhai district bika information an dawn danin ration card khulna hi a let aia to Rs.50, Rs.30 tea khul tir an ni, tiin, sawrkar rate bituk aia a leta tama ration card inkhultir chu eirukna lian tak a ni tih an sawi a ni.
“Uchuak taka ration man tihto tawh bakah ration card man lehzel an bithliah aia to taka min khul tir hi na kan ti a, hetiang em ema sum duh sawrkar kan nei hi vanduaithlak kan ti a; hetianga rate bituk aia toa ration card min khul tir tawh zawng hi min pelet turin sawrkar kan phut a, thla khat chhunga min pe let lo a nih chuan MNF-in mipui thlavang hauhin hma a la dawn a ni,” Vigilance Committee chairman chuan a ti.
Tunah hian buk tling lo takin ration buhfai hi mipuiin kan khul mek a, min tiam ang ngeiin buhfai buk dik tak min pe turin kan phut a ni, tiin a sawi bawk.