MUHCS-ah mipuia puan zar loh thil inphumru awm – Dr R Lalthangliana
MUHCS-ah mipuia puan
zar loh thil inphumru awm
– Dr R Lalthangliana
ZPM sawrkarin health care scheme thar a duanah mipuia puanzar loh thil inphumru a awm nual a, hausa leh rethei inthliarna dik tak a ni tih chu a khaikhawmna a ni tih Health minister hlui Dr R Lalthangliana chuan a sawi.
Thawhtannia Mizo Hnam Run-a inkhawmah MNF senior vice president Dr R Lalthangliana chuan, Mizoram Universal Health Care Scheme-ah a chhunga AB-PMJAY phumru chungin ‘cashless’ a kalpui an tum tih a sawi a. Sawrkar hospital zawng chu MUHCS hnuaiah ‘paying hospital’ a siam an ni, tiin, sawrkarin engkim a tum, thawktute hlawh a pek, tui leh electric bill a pek an ni tih a sawi.
“Sawrkar hospital-te hian damlo an enkawlte hnen atangin inenkawlna an bill dawn tihna a ni a, ‘paying hospital’ ah an siam dawn tihna ni. Sawrkar hospital-a damlo inenkawlna bill atanga an re-imburse hi enga hman tur nge, damdawi ina thawk doctor leh staff-te hlawh sawrkarin a pe bawk si. ZPM sawrkar hian mipui damlohna hi sum hmuhnan hman a lo tum reng tihna a ni em,” a ti.
Private hospital ang maiin damlo bill an pe ta vel a ni ber a. Chu bill chu MUHCS sum atan laklet sak lehin, chu chu hmingthatpui an tum nia a lan thu a sawi.
Sawrkarin MUHCS cashless-a a kalpui avanga Non-Government Hospital Association of Mizoram-in an zawm duh loh chungchangah, sawrkarin engkim a thlawna a pekna Civil Hospital Aizawl-a damlo zaina rate anga private hospital ho rate a bituk sak, hman luihtir a tum chu thil tih theih loh inbarluih tumna a ni tih a sawi bawk.
MUHCS guidelines-a awm mipuiin an hriat tur, mah se, sawrkarin a thup a awm tih Health minister hlui hian sawiin, “Civil Hospital Aizawl leh Zoram Medical College & Hospital-ah emergency case/ life threatening bakah service (khum awm lo) a awm loh hun atan emergency certificate (refer to Ebenezer/ LRM/ Trinity/BN Hospital) hmanga damloten MR an bill theihna tur dan a awm a. Hei hi mipuiah an puangzar duh tlat lo. He thil hi a serious a. Sawrkar hian damlo tanpui nge a tum a tlem thei ang ber bill tir (save) tih hi ka zawhna a ni,” a ti.