Artui thar chhuah tipung turin Thenzawlah arpui farm din tum

henzawl Vety Farm-ah artui tharchhuahna (Mega Egg Production Farm) leh sial vulh punna hmun siam a ni dawn a. Nitin artui singsarih chuang thar tum a ni dawn. Heng thil pahnih bakah he hmun veka thir lei (Bailey Bridge) dawh tur chu Ningani khan chief minister Lalduhoma’n a lung a phum a. State pawn atanga artui leina atan Mizoram-in kumtin cheng vaibelchhe 22 vel kan seng tih sawiin, “Artui tharchhuaktu state lamah kan sum a liam hnem em em a. Kan mamawh zawng zawng thar theihna farm kan din thei lo a nih pawhin engemawzat kan lo tharchhuah ve dan tur tal dap tha kan ti a ni,” a ti.
AH & Vety minister leh department hmalaknaa ran vulh lama hma sawn tur leh artuia intodelh turin chak takin hma lak a ni tih chief minister hian sawiin, “Kei pawhin theihtawp chhuahin he project hlawhtlin theihnan hian ngaihtuahna ka seng a, intodelhna project a nih angin ka ngaipawimawh hle. He project sum hi a nihna ang taka kan hman ka duh a, eirukna a inrawlh thiang lo,” a ti.
AH & Vety minister C Lalsawivunga pawhin, sa leh artuia intodelh tura hma lak dawn chuan, ranchawa intodelh hmasak a ngai, tiin, tunah hian Saitual leh Champhai district khaw thenkhat atangin chhungkaw thlan bikten pilot project angin vaimim an chin tan bakah khawvelin ran chaw atana a buaipui mek ‘Blue African Flies’ an buaipui tih a sawi. “Rannung tereuh te te an ni a, heng hi a tihpun dan kan ngaihtuah a ni,” a ti.
8 Artui tharna farm buatsaih turah hian arpui nuai khat awm thei tur leh nitin artui 75000 vel thar thei tura duan a ni. A thawhna tur fund hi NABARD RIDF cheng vaibelchhe 20.64 dah a ni.
8 Mizo sial vulh punna centre hi Rashtriya Gokul Mission 2023- 2024 sum, nuai 430 senga din a ni a. Civil works bikah nuai 253.50 dah a ni.
8 Zo sial hi inthlahpawlh an tam tawh avangin an pianphung pawh nasa takin a danglam chho a, an fek tawlh tawlh niin a hriat tih mithiamte chuan an sawi a. Breed Development and Conservation Centre-ah hian Zo sial chi tha, performance tha zawk tharchhuah tum niin, semi intensive-a vulh tur a ni. Sial 100 thleng vulh theiha ruahman a ni.
8 Bailey bridge hi Vety Farm chhunga dil, Dilpui an tih, a dil lailia thliarkara siam kalpawhna tura dawh a ni a. Dil ral lehlama ran chaw chinna hmun kalpawhna a ni nghal bawk. Hna hi NABARD sum nuai 83 senga sak tur niin lei pahnih dawh tum a ni.