State-ten police chawl ko kir, ramriah sikul chawlh puang

State-ten police chawl ko kir, ramriah sikul chawlh puang
India leh Pakistan boruak sang mek kal zelah state tam tak chuan sikul chawlh an puang a, ramri hrul district-ah êng tithim vekin police leh sorkar hnathawk chawlh la an ko kir bawk.
April 22-a Pahalgam-a mi firfiakte chetna chhang leta India-in Pakistan a kah hnuah Punjab, Haryana, Rajasthan, Delhi, Gujarat, West Bengal leh Bihar chuan inkaihhruaina hi an siam thar.
Punjab hi Pakistan nen km 532 an inri a, Rajasthan nen km 1,070 chuang leh Gujarat nen km 506 vel an inri a. West Bengal hi Bangladesh nen km 2,217 an inri thung.
Punjab-ah chuan police chawlh la koh kir vek niin state sorkar chuan Ningani khan ramri district parukah sikul chawlh a puang bawk.
“Thuneituin a bika phalna a pek tih loh chawlh lak theih a ni lo,” tiin DGP pisain thu a chhuah.
Punjab-ah hian Ferozepur, Pathankot, Fazilka, Amritsar, Gurdaspur leh Tarn Taran district-a sikulte chu thupek chhuah leh hma khar a ni.
Gurdaspur-ah hian Ningani zan dar 09:00 atang khan darkar riat awh tur blackoit kalpui a ni bawk.
“Punjab hi Pakistan nen km 532 kan inri a. Sipai inelna sang karah Punjab sorkar chu a inring hle a. Ramri hrul district zawng zawng an inralring hle,” tiin Punjab Minister Aman Arora chuan Nilaini khan a lo sawi tawh.
An thenawm, Haryana-ah chuan police leh health department-a thawkte chu thupek siam leh hma an chawlh koh kir an ni.
District zawng zawnga civil surgeon-te chu an thawhna hmunah awm vekin district khawpui chhuahsan lo turin an ti.
Delhi sorkar pawhin a hnathawkte chu thupek awm leh hma chu chawlh la lo turin a ti.
Khawpui bera district magistrate zawng zawng chuan an subordinate-te chu hriselna leh chhiatrupna hmachhawntute nen rikrum a awma che thei tura inring turin thutkhawm an neihpui hlawm bawk.
Punjab nena inri, Himachal Pradesh pawhin ramri district – Hamirpur, Una leh Bilaspur venhimna a tikhauh bawk.
District pathuma temple hriat hlawh – Baba Balak Nath, Maa Chintpurni leh Maa Naina Devi te chu police-in ngun lehzualin an veng.
Rajasthan sorkar chuan International Border hrula inawpna lam khawitu leh police-te chawlh lak khapin ramri district-a sikul chawlh a puang.
Rajasthan khawthlang lama ramri hrul district-ah chuan blackout kalpui a ni a. Barmer leh Jaisalmer district-ah chuan thlawhna atanga beihna laka him nan zan dar 09:00 leh zing dar 04:00 inkar eng tihthim a ni a. Jodhpur-ah chuan zanlai dar 12.30 leh zing dar 04:00 inkar a ni thung.
Bikaner leh Sri Ganganagar-ah chuan drone thlawhtir leh halmawi hal khap a ni.
Thuneitute chuan Sri Ganganagar, Bikaner, Jodhpur, Jaisalmer leh Barmer district-ah sikul chawlh an puang a. Jodhpur-ah hian college khar a ni bawk.
Bikaner, Ajmer-a Kishangarh leh Jodhpur tumhmuna thlawhna lut leh chhuak tur chu Inrinni thleng tihtawp a ni a. State pumah venhimna tihkhauh a ni.
Gujarat vaukamah pawh venhimna tihkhauh niin thuneitute chuan police chawlh la chu ‘engpawh thleng thei’ a nih avangin an ko kir a. He state hi khawmual leh tuipuiah Pakistan nen an inri.
Rajkot Range Inspector General Ashok Kumar Yadav chuan tuipui kama police-te chu an inring hle tih a sawi.
Rajkot Range district panga zingah Jamnagar, Morbi leh Devbhumi Dwarka ten tuipui kam an nei a ni.
Police-te hian tuipui kam khua fangin ‘lawng thlanna hmun’ an thlithlai uluk a, khaw mite leh sarpanch-te chu rinhlelhawm an hmuh chuan police hrilh turin an ti bawk.
West Bengal sorkar chuan an hnuaia thawkte chu thu awm leh hma chawlh la a koh kir a. Damlohna avanga chawlh la chauh ngaihhnathiam an ni.
Bihar-ah chuan police leh disaster management department-a thawk chawlh hmangte an ko kir bawk.