Pope atan Prevost thlang, Leo XIV ni dawn

On May 10, 2025 49 0

Pope atan Prevost thlang, Leo XIV ni dawn
Latin America-a missionary-a rei tak lo awm tawh, Cardinal Robert Prevost chu Ningani zan khan Catholic Church hotu lu ber atan thlan chhuah a ni ta a, US atanga pope ni hmasa ber a ni dawn a, a hmingah Leo XIV tih a ni ang.
Pope Leo hi cardinal 133-ten thla hmasaa thi ta, Francis-a thlak tura Sistine Chapel-a vote an thlakah thlan meikhu chhuahnaa meikhu var a chhuaka pope thlan fel a ni tih puan a nih hnuah niin St. Peter’s Basilica balcony-ah ainlan zui.
“In zavaia chungah thlamuanna awm rawh se,” tia Italian nal taka thu a sawi tan chuan mi tam takin kut bengin an lo lawm a. Pope a nih hnua thu a sawi hmasak berah hian Spanish-in tawi te a sawi bawk a, saptawng a hmang lo.
Kum 69 mi, Prevost-a hi Chicago chhuak ni mah se rawng a bawl hun tam zawk chu Peru-a missionary-in a thawk a, Peruvian nihna pawh a nei. Kum 2023 khan cardinal a ni tan a, chanchinbumite hmaah a inlan tam lo hle a mi zakzum tak nia sawi thin a ni.
President Donald Trump-a pawhin an ram mi pope an nei ta chu lawmawm a tih thu a sawi nghal a. “A phurawm a, kan ram tan chawimawina ropui tak a ni. Pope Leo XIV hmuh hlan pawh ka nghakhlel hle,” a ti.
Pope thar hi Trump-a leh Vice President JD Vance-a rorel dan sawisel nasa tak a ni a, Robert Prevost tih hmingin sawiselna hi X-ah a tar lang fo.
Pope zingah Leo tih hming pu hmuhnung ber chu 1878-1903 inkara mi a ni a. Leo XIII kha vantlang intluktlanna lam bei nasa a ni a, tun lai thlenga kalpui Catholic-ten vantlanga rawng an bawlna lam zirtirna bul tantua ngaih a ni.
Prevost-a hi Peru khawthlang lam, Chiclayo-ah kum 2015 leh 2023 inkar khan bishop a lo ni tawh.
Francis-a chuan kum 2023 khan Rome-ah sawnin Vatican office-ah puithiamten Catholic bishop-te khawvel puma an awmna tur hmun siam feltu hotuah a ruah a, bishop tam tak hi a thlan an ni nghe nghe.