Heroin man hnem leh tawh

Ruihhlo man thu hriat tur a awm deuh reng a ni ber a, kuminah excise force te leh police te’n heroin hi an man hnem leh tawh. Tun hnaiah phei chuan sawi luih luih tham khawpa tam an man fo.
Mizoram Excise & Narcotics (MEN) department-in kuminah April thla thleng khan heroin hi kg 22.761 an man tawh a, thla li chhunga an man hi a tam hle. Nikum khan heroin a hluar hle tawh a, kum khat chhunga an man kha kg 46.680 a ni. Chumi zatve thuak chu kuminah thla li chhungin an man tawh.
MEN department hian 2015 khan heroin kg 4.088 an man a, 2015 kha kum khat chhunga kg 4 an man tlin vawi khatna a ni. Hemi hnu hian kum khat chhunga an man zat hi nasa takin a pung.
2023-ah khan kg 76.058 an man a, 2023 hi an man tam ber kum a ni. 2022-ah kg 33.418 an man.
Police-in heroin hi an man lawih lawih bawk a, CID (Crime Branch) te’n an chhinchhiah danin, 2024-a Mizoram Police-in an man zat chu kg 80.814 a ni. 2023-ah kg 68.055 an man a, 2022-ah kg 49.367 an man. Kuminah March ni 20 thlengin kg 14.572 an man.
MEN department hotute chuan heroin an manah hian Mizoram pawna mi tur a tam tih an sawi a, a hlawm tam tham an man phei hi chu Mizoram pawna mi tur a ni tlangpui an ti.
Heroin hluar dan hi a nasa a, Aizawlah chuan khawlaiah pawh a zalen. Zalen takin an zuar a, zalen takin an lei. Zan lamah pawh khawlaia ruih chilh an awm a, tun hnaiah Lammual ram chhunga chhun leh zanah ruihhlo ti thin an lut nasa tih thu dawn a ni.