Russia-in Ukraine a kah nasat ber zanah mi 12 thi

Russia-in Ukraine a kah nasat ber zanah mi 12 thi
Russia chuan zan khat thil thua Ukraine a kah nasat ber tumah drone leh missile thahnem takin a bei.
Ukrainian thuneitute chuan naupang pathum telin mi 12 an thi a, mi thahnem takin hliam an tuar niin an sawi.
Inrinni zana a beihna hi darkar 48 chhunga lian tham taka a beih vawi hnihna niin a hma zanah Ukrainian khawpui, Kyiv-ah indona a chhuah hnua a beih nasat ber tum a thlentir tawh bawk.
Inrinni zana a beih hma lawk hian Russia hian inkahhai puang tura tihna a hnawl bawk.
Ukrainian President Volodymyr Zelensky-a chuan Pathianni tukah khan khawpui leh khaw 30 chuangah beihna nasa tak an tawh avangin chhanchhuah hna thawktute an thawk chhuak tih a sawi.
“Russia hian indona a kalpui zel a, ni tin mi an la that zet a ni,” a ti.
“Khawvelin kartawp chawlh an hman laiin indo a kal zel a, kartawp leh tawp lovah pawh a ngai reng a, hei hi chu ngaihthah chi a ni lo,” a ti.
Ukraine hian a thawhpui ramte chu inkahhai puang tura na zawka Moscow nawr turin a ti.
“Russian hruaitu hi na taka nawr a nih loh chuan rawng taka chetna hi a tawp mai mai dawn lo,” a ti a, na zawka hrek turin a ti bawk.
Zelensky-a hian ‘America ngawi chuan Putin-a a tihuaisen sawt’ niin a sawi a, US President Donald Trump-a chuan Russian hruaitu hian indo tihtawp a duh niin a sawi tawh ve thung.
Putin-a hian Ukraine hi February, 2022 atang khan rûnin Moscow hian Ukrainian ram 20% chuang a thunun tawh a. Heng zingah hian kum 2014 atanga Ukraine chhim lam a luahsak, Crimea pawh a tel.
A zat zawnga chhut chuan Inrinni zana drone leh missile hmanga Russia-in a kahna hi a tam ber tum a la ni.
Ukraine-a Air Force chuan an rama Inrinni zan dar 08:40 (India-a zan dar 11:20) atang khan Russia hian missile chi hrang hrang, unmanned aerial vehicle (UAV) leh drone 367 laiin a kap niin an sawi.
Air force chuan cruise missile 45 leh UAV 266 UAV an kap thlaa a, a tam ber hi Ukraine ram chhungah niin 22 chu an ram chhungah a tla niin an sawi a. Thi pawh region hrang hranga mi a nih thu an sawi.
Russia-a defence ministry chuan an tum chu military airfields, ralthuam chhekna leh electric warfare station a nih thu leh hmun 142 an tichhia niin an sawi.
Ukraine-a Internal Affairs Minister Ihor Klymenko chuan region 13 kah a nih thu leh mi 70 chuang an inhliam a, chenna in 80 chhiain 27 a kang niin a sawi.
Thi mi 12 zinga pathum hi naupang kum riat, 12 leh 17 niin Zhytomyr region-ah a nih thu Ukraine-a state emergencies service DSNS chuan a sawi.
Klymenko chuan chhungkaw pakhata mi an nih thu leh an nu leh pate pawh damdawi ina awm ngai an nih thu a sawi.
Kyiv region-ah chuan mi pali thain mi 16 an inhliam a, naupang pathum an tel niin DSNS chuan a sawi.
Moscow-in a kah ni hi kum tina an hman thin, Kyiv Day chawlh an hman lai tak a ni.
Russia-ah pawh defence ministry chuan region 12 chuangah Inrinni zanlai leh Pathianni zing dar 07:00 inkarah Ukrainian drone 110 tihchhiat leh kah thlak a ni tih a puang a. Thi an awm lo niin a sawi.