A chung berah Mbappe

Europe a tualchhung league tam zawk chu khelh zawh a ni ta a, European Golden Shoe dawn tuma inelna boruak pawh tawp felin Real Madrid forward Kylian Mbappe chu a chung berah a awm a. A vawi khat nan European Golden Shoe a dawng.
Forward tlan chak leh ball thiam, finishing tawih zet mai Kylian Mbappe hian Paris St-Germain atangin La Liga champion Real Madrid a zawm. Real Madrid tan beisei angin bul a tan tha lova, a game hmasa lamah goal a thun tam thei lo. Real Madrid tan a khel rei telh telh a, Mbappe theihna tak tak a lang a, goal a thun thei ta hle. La Liga season a tawp meuh chuan Mbappe hian goal 31 a thun a, La Liga top-scorer niin Pichichi Trophy a dawng.
La Liga top-scorer Mbappe hian point 62 hmuin a vawi khat nan European Golden Shoe a dawng tel bawk. European Golden Shoe dawng tura inelnaah Mbappe hian La Liga-ah goal 31 thunin point 62 a hmu. Mbappe hnuai chiahah hian Portuguese Primeira Liga-ah Top-scorer Viktor Gyokers a awm a, Arsenal nena sawizawm mek Gyokeres hian point 58.5 a hmu. English Premier League top-scorer Mohamed Salah chuan point 58 hmuin pathumna a luah a, palinaah point 54 hmutu Robert Lewandoski a awm a, Bundesliga top-scorer Harry Kane chuan point 52 hmuin palina a luah ve thung.
European Golden Shoe dawng tur thlanaah hian Europe a league lian zual panga; English Premier League, Spanish La Liga, Italian Serie A, German Bundeliga leh French Ligue 1-a khel ten goal khat an thunin point hnih zel an hmu a. League hniam deuh hret a mi ten goal khat an thunin point 1.5 an hmu ve thung. Swedish striker Gyokeres chuan Sportin CP tan Portuguese Primeira Liga-ah goal 39 lai a thun a. Mbappe ai hian goal 8 ngawtin thun tam zawk mah se, point ah erawh Mbappe hi 3.5 in a tluk lo thung.
Mbappe hi Real Madrid player zingah European Golden Shoe dawng thei pathumna a ni a, Hugo Sanchez leh Cristiano Ronaldo te hnung a zui.