CLIMATE SMART, SUSTAINABLE FARMING – 22

RK Dawla
Mb 9366095658
1. May leh June thla inrina lai velah ruahtui thahnem tak kan dawng a. Hmun hrang hrangah chhiatna leh vanduaina kan tâwk a, nunna hlu tak chân te, in leh lo leh hmunhma pawimawh chân te, lo leh huan, sangha dil leh thlam chenin khuarel chhiatna chuan min vaihma vek mai a. A pawi takzet a ni. Leilung nghet lo, awihpang bawk si, ruah bawhawk dawng thin kan nih miau avangin, ‘Climate change’ vanga harsatna tam tak hi a irhchhuah kan tawng fo va, kan tawng zel dawn bawk a. Tun tum chhiatna ringawt pawh hi kan ram economy nghawng pha a ni dêr a! Hun lokal lehzel tur atân kan hmakhua tur pawh kan ngaihtuah thiam a tul viau ngei ang.
2. Kan ram angah hi chuan, motor kawngpui lian (Four lane) ang chite hi a tul ber em tih ngaihtuah tham tak niin a lang. Soil profile kan tihchhiat vanga ecosystem hrang hrang kan tihchhiat chu thuhran nise, kan kawngpui laihna vûng leh kawng laih vanga leimin insiamin chhiatna a thlen hi ngaihtuah phâk bâk thil a ni takzet a. Hmun rualrem tha kan ngah loh avangin, ko pang pawh slope tha taka laih hleih theih lohna kan ngah êm êm. Tin, National Highway a ni emaw, State Road a ni emaw, Internal Road leh Link Road pawh nise, kawng laih ngawr ngawr piah lamah, tuihawk luanna tha kan mamawh êm êm. Hei hi kan ngaihthah thin avangin harsatna tam tak kan tâwk mêk a ni. Tuihâwk chu a tlem laia control a nih loh chuan, a tam tawh hnu chuan control turin mihring chakna hian a daih tak tak tawh thin lo. Kan huan/lo chauh ni lovin, kan chenna In atanga Ran In thlengin, tuihawk manage dan mumal tak kan mamawh a, kan kawngpui chu sawi lohva lum nise. thal laia kawngpui mâm purah kan tlan chuan kan lungawi mai a. Kawngpui leh kobang inkara tuiluanna that leh that loh ngaihtuah phâ kan tlêm! Heti taka ruahtui tamna ram ni si, tuihawk kan CARE lo êm êm mai hi thil inhmeh lo tak a ni. Vantlang Zun In rimchhe lutukte pawh hi, fur lai bikah chuan, a chung khuhna tuidawn siamin, zun tleuhfai thei tura duan âwm tak a ni a. Mahsela, chutiang Zun In chu kan ramah a vâng hle… Man to takin Zun In kan siam a. A bang leh chhuat kan uluk viau a, a chung pawh mawi leh nalh takin kan khuh a, kan duhtâwk dêr! Mahsela, kan Zun In man tamte chu a tawp êm êm a, fur lai takngial pawhin ruahtui hmang tangkaia zun hing tleuhna siam nachâng kan hre lova, plastic bawlhhlawh bawm emaw tih mai turin, tawih theilo a tam êm êm thin. Meghalaya state-ah chuan, thingtlang leh khawpui chenin, an Zun In a thinghlim khawp mai! Sanitation-ah chuan Mizote hian Khasi chawn-tawiho kan la tluk lo khawp mai. Harh a hun hle.
3. Farming-ah pawh kan leilung leh sik leh sa mila chêt thiam kan mamawh. Lui kamah chuan, tui a lian fo thin a. Hnâwl a chhêk a, thenfai buaithlak deuh mah se, leihâng a siam thung a. Tui len loh hun laiin thlai chin a that phah ve thung a. Tlangram awih pangah erawh huan chhunga tuihawk vâkvai tur mumal taka control kan ngai. Leimin siam êm lo mah se, tuihawk hian lei chunglang hâng a tleuh tho thova, khuareiah chhiatna a thlen tho tho. Mi tam tak chuan Terrace farming hi ruahtui tam awihpangah chuan tha-in kan hre thin a. A dikna chen a awm. Mahsela, kan laih dan kha a paiwmawh thung. Lei chunglang paih bo zawnga terrace laih thar vung kan ching a. Thlai chinna tlâk tura din thar leh tur chuan hautak lutuk tak mai a ni a. Chemical fertilizers nên tan chiam a ngai tawh thin. Hei vang hian PC sawrkar lai ata tawh vawiin thlenga terrace laihte, chhawr tangkai loh sawi tur a tam mai! Engpawhnise, ram intodelh, zahawm leh nuam siam turin kan thlen chin atangin hma sawn zel turin intichak deuh deuh ila, danglamna nghet thlen turin theihtawp i chhuah teh ang u.