Vawih hmangin record siam

Hmanah, Skylink hunlai khan, Talent Hunt an buatsaih a, Kulikawn a cheng a ni ta awm e, nu pakhat, a duh hun hun a vawih thei a awm a, chu a talent chu Talent Hunt-ah a telpui ta a. Mizoram huapa reality TV talent show hmasaberah khan lawm pawh a hlawh viau a nih kha. Tichuan, ani chauh kha duh hun huna vawi thei awm chhun a lo ni lo. Sap pa, Paul Oldfield pawh a duh hun hunah a vawih thei a, chu chu eizawn nan a hmang a, Guinness World Records-in eizawn nana vawih hmang rei berah puangin, Guinness title an hlan!
Paul-a hian yoga a tihlaiin ‘full lotus’ position-a a awm laiin a mawngkuain boruak a hip lut thei tih a inhre chhuak a. A thiam thil neih thar chu thiam lehzual turin a inzir ta ngat ngat a, a mawngkuain boruak a hip lut a, chu chu a duh hun hunah a vawih chhuak leh mai a, a hming lemah ‘Mr Methane’ tih an phuah sak ta hial a, superero anga incheiin, a vawih theih chu mite tihhlim nan leh eizawn nan a hmang zui ta a, kum 35 chhung chu ‘flatulist’ a ni ta reng mai a, Guinness World Records a siam ta a ni.
Paul hi Cheshire a rel (train) khalh thin a ni a, mahse, a talent chhar thar chu eizawn nan a hmantlak dawna hriain, rel khalh aiin vawih hmanga eizawn a thlak ta a. 1980s atang khan a thiante tihhlim nan a talent thar chu a hmang tan ta a ni.
Paul hi 2009 khan Britain’s Got Talent-ah pawh a inlan a, khawvelin TV atanga an lo thlir turin a mawngkaw bulah microphone dahin, a vawih ta pawng pawng mai a ni. Second 40 vel a talent chu a show hman tihah judge zawng zawngin an hnawl nghal vek a, Simon Cowell phei chuan ‘thilnung tenawm’ tiin a comment a, mahse, heta tang hian a lar zual ta hle a, flatulist ang eizawn nan a perform regular ta hle mai a ni.
Sum hmuh nana vawih a hman tan tak takna chu 1990 kha niin, Mr Methane angin Yorkshire Television programme ‘The James Wale Radio Show’-ah a inlan a, hei hi TV-a vawih avanga hlawh neia a inlanna hmasa ber a ni. 1991-ah chuan a hna nghet, British Rail a rel khalhtu hna chu bansanin, ram hrang hrangah zin kualin a thiam thil chu sum dehchhuah nan a hmang ta zawk a ni.
Performing flatulist ni tur hian vawih theih ringawt a tawk bik lo a, music rema vawih theih te, a rik dan chi hrang hrang a vawih theih te a ngai a. Hetiang vawih hmanga eizawng hi hmakhawsang atangin sawi tur an lo awm tawh a. Sap lal, King Henry II hunlai pawhin lal tihhlim nan leh fiamthu thawh nana vawih thin Roland the Farter an tih a awm a, ani pawh hi King Henry II ian in leh ram zau tak a pe. Kum zabi 17-naah khan Tokyo-ah Kirifuri-anasaki-otoko a awm a, ani pawh fiamthu thawh nana a duh hun hun a vawih thei a ni awm e! France-ah pawh La Petomane- aka Joseph Pujol a awm a, ani pawh tuxedo nena induang deuh zaihin, stage-ah a vawih hmangin a perform thin a, Moulin Rouge, Paris-ah ‘rectal breathing and musical anus’ tih stage show a lo nei tawh thin.
Le Petomane hi eizawnna bulpui ber atan chhang ur thin a ni a, mahse, 1887 atanga Khawvel Indopui Pakhatna, 1914 thleng khan ‘farteur’ niin, vawih chu eizawn nan kum 27 chhung a hmang a, he record hi Mr Methane hian a rawn khum ta a ni.
Mr Methane hi TV show, fakna leh stage-ah te inlanin, Circus of Horrors-ah te pawh a tel a, Howard Stern-a show-ah te pawh a inlan tawh. 1998 khan music album ‘mr methane.com’ a tichhuak a, 2001 khan Krismas album ‘Merry Methane’ a tichhuak tawh bawk. Heng a album te hi music rema a vawih hmanga a siam ve ve an ni. |um khat pawh khawvela vawih rei ber record siam tumin a bei a, second 59 chhung chawlh awm miah loin a vawih thei!
Tunah chuan Paul hian YouTube page te neiin, hla hrang hrang a vawih hmanga lo rem vein, video te a siam a, khawvel hmun hrang hranga comedy club velah a thiam thil dangdai tak hi entirin a zin kual zak zak bawk.