Environment Day-ah plastic hman tlem tul tawh zia aupui

Environment Day-ah plastic
hman tlem tul tawh zia aupui
Indian Council of Forestry Research & Education (ICFRE) – Bamboo & Rattan Centre Bethlehem Vengthlangah “Ending Plastic Pollution” tih thupui hmangin Ningani khan World Environment Day 2025 hman a ni.
Hmanpuitu Horticulture minister C Lalsawivunga chuan kan nitin khawsaknaa vawikhat hman plastic kan hmang tam lutuk titlem turin mahni atanga bul tan a tul tih a sawi a. Plastic chu a tawihral ve mai loh avangin a tihralna leh sawngbawlna mumal a awm loh chuan kan tui tlan tibawlhhlawhtu, leimin thlentu, mihring leh nungchate tana hnawksak a ni tih a sawi.
“Vawi leh khatah kan tirem nghal thei lo a nih pawhin, zawi zawia plastic hmanna titlem turin kan nitin khawsak dan kan inherrem thiam a tul a,” a ti.
ICFRE-RFRI Jorhat director Dr Nitin Kulkarni chuan inbiak hmuh theihna hmangin thupui a sawizau a. Environment Day hmanah hian Bethlehem Vengthlang Local Council, Save the Riparians, Pachhunga University College Eco-Club leh Govt. M/S-II Bethlehem Vengthlang zirlaite an tel a. Kawng dung thianfaiin an hnatlang nghal a ni.
Indian Council of Forestry Research & Education hnuaiah hian research centre 5 leh institute 9 a awm a, ICFRE Bamboo & Rattan Centre hi Rain Forest Research Centre hnuaia awm niin, 2004 November 29 khan hawn a ni. ICFRE-BRC Bethlehem Vengthlang hi hectare 11.63-a zau a ni a, mau species 28 leh Rattan species 11 a awm. Research project 16 hlawhtling taka kalpui a ni tawh a, tunah hian research 3 kalpui mek a ni.