Kawng tha sa an siam chhia – Congress Thalai

Kawng tha sa an siam chhia
– Congress Thalai
Congress Thalai chuan Ningani khan Chanmari leh Bawngkawn inkar kawng PWD-in bituminous concrete hmanga a thawmthat mek an tlawh.
Congress Thalai senior vice president Ngurdingpuia Pachuau chuan kawng chhia avanga rei tak harsatna tawk tawh ATL road siamna tur pawtpeng a, kawng tha sa zawh hrehawm khawpa an siam chu a thlangtu mipui pawisak lohna lian tak a ni, tiin, “ZPM sawrkar hian eizawnna atana hmang leh lirthei ke hnih nei khalhtute tan thang an kam a ni,” a ti.
Tunhma zawnga la tih ngai loh, kawng chhe siam tura ribbon chep chat meuha PWD minister-in a hawn takah kawng chhe siamtha tura hmala turten kawng tha sa an tichhe vek nia sawiin, lirthei ke hnih nei chi an tlu nasa a, hliam tuar leh lirthei chhiat phah pawh an awm nual tawh niin a sawi.
Hriselna atana tha lo hot mix plant mipui thinrimin an tih chhiat chungchangah PWD minister-in khawl tihchhiat avanga kawng siam hnathawh chhunzawm a harsat thu a sawi chu thil zahthlak a ni tih Ngurdingpuia hian sawiin, “Hetiang khawl awm hma pawhin kum tam tak kawng hi siam a ni tawh a. Khawl chhia hi chhuanlam a tling lo. He khawl hmanga an kawng siamin an inzawrhna anga kum 15 daih tura an sawiin fur khat pawh a daih loa. A sawia sawi aia a thawha thawk thei sawrkar Mizoram-in a mamawh zia a tichiang a ni,” a ti.
Pu Vanlalhlana’n ZPM inkhawmah kawng chhiaah mipui a dem chu mahni chanvo hre lo a nih zia a pholang tih Congress Thalai hruaitu hian a sawi a. Midang kutah PWD minister a nihna hlan ngam turin an ngen tih a sawi.