Russia-in Ukraine chhim lam a kahnaah mi 17 thi

Russia-in Ukraine chhim lam a kahnaah mi 17 thi
Russian thlawhnaten Thawhlehnia Ukraine chhim lam an kahnaah mi 17 vel an thi a, sikul, damdawi in leh mihring phur rel a chhia niin Ukranian thuneituten an sawi.
Dnipropetrovsk region an kahnaah hian mi 100 chuang an hliam niin Ukrainian President Volodymyr Zelensky-a chuan a sawi a. Hmarchhaka Sumy khawpui beihnaah nausen telin mi pathum an thi bawk.
Zelensky-a’n Nato summit-a European hruaitute kawm tura Netherlands-a a thlen mek laiin chhunah thil thleng khât tak tiin Russia hian an bei a ni.
Zelensky-a hian US President Donald Trump-a pawh a hmuh rin a ni a, ram venhimna lam thil bakah na zawka Russia hrekna tur a sawipui ang.
Dnipropetrovsk kah a nih thu hi social media-ah tar langin Zelensky-a chuan Russian sipaiten hian ‘mihring nunna an zah miah lo’ niin a sawi.
Emergency services-te chuan chhanchhuah hna thawktuten thisenin a bual zuih mihring an pui lai thlalak an tichhuak.
Rel kahnaah hian mihring thi an awm lo va, a chuang pakhatin video a lakah chuan nasa taka insawiin thiin a bawh tih a lang a. Tual chhung sipai thuneitute chuan a bul lawkah ballistic missile-in a kap fuh niin a sawi.
Dnipropetrovsk hi tun hnaia Russian-ten hma an sawn mek laia an beih nasat a ni thar a, unit tlem azawngin ramri kân industrial region hi an lut tawh a, Russia chuan an lut thuk tawh hle tih an sawi.
Ukrainian sipai thuneitute erawh chuan Russian sipaite hi ramri chhehvel atangin hlawhtling takin an nawr kir tih an sawi ve bawk.
Sumy region-ah sipai thuneitu sang, Oleh Hryhorov-a chuan in chim karah mipa naupang kum nga mi ruang lak chhuah a ni tih a sawi.
“Min beihna hian chhungkaw hrang hranga mite a tihlum a, kawtthler khata cheng an ni a. An ina an mut laiin Russian drone-ten kumkhua atan an tibuai a ni,” a ti.
Dnipro bul lawka Samar khuaah mi pahnih an thi bawk niin emergency service chuan an sawi.
Russia leh Ukraine indona hi kum thum chuang a nih hnuah pawh tawp lam a pan hmel rih lo hle a, thla hmasa khan Istanbul-ah inbiain mi tang leh ruang inthleng an rem ti a, a bak indawr zuina an la nei lo.